ئێوارەى ئەمڕۆ لەلایەن کۆمەڵێک کەسی نەناسراوەوە چەندین خێمەی خۆپیشاندەران لەگۆڕەپانى تەحریرى  بەغداى پایتەخت سوتێنرا و گرژى و ئاڵۆزیش لە نێوان خۆپیشاندەران و هێزە ئەمنییەکان دروستبوو.

 میدیاکانى عێراق بڵاویانکردەوە، لە خۆپیشاندانەکانى بەغداى پایەتەخت گرژى دروستبووە و خێمەى خۆپیشاندەرانیش لە گۆرەپانى تەحریر لەلایەن کۆمەڵێک کەسى نەناسراوەوە سوتێنران، هەر ئەمڕۆ لەزۆربەى شارەکانى دیکەى عێراق خۆپیشاندان دەستیپێکردەوە و هێزە ئەمنییەکانیش هەوڵى بڵاوەپێکردنی خۆپیشاندەرانیاندا.

هاوکات، لە پارێزگاى نەجەف کۆمەڵێک کەسی نەناسراو لە نێوخۆپیشاندەرانەوە هێرشیان کـردە سەر هێزە ئەمنییەکان و بە فیشەک وەڵامدرانەوە، لە پارێزگاى بابلیش ماڵی سەرۆکی پێشووی ئەنجومەنی پارێزگا لەلایەن خەڵکانی نەناسراوەوە سوتێنرا و ئاڵۆزی لە نێوان خۆپیشاندەران و هێزە ئەمنییەکانی دروست بوو.

ئەوەش لە کاتێکدایە، دواى نزیکەى ساڵێک لە کۆتایهاتنى خۆپیشاندانەکانى بەغدا و شارەکانى دیکەى عێراق، ئەمڕۆ جارێکى دیکە خۆپیشاندان لە گۆڕەپانەکانى تەحریر و خەلانى و پردى سەنەک لە بەغدا و چەند شارێکى دیکە دەستیان پێکردەوە و هیزە ئەمنییەکانیش روبەڕویانبوونەوە.