مایک پۆمپیۆ، وەزیری دەرەوەی ئەمریکا رایگەیاند، هێشتا دۆناڵد ترەمپ سەرۆکی یاسایی ئەمریکایە و تا ئێستا پڕۆسەی جیاکردنەوەی دەنگەکان تەواو نەبووە.

لە چاوپێکەوتنێکی مایک پۆمپیۆ لەگەڵ کەناڵی فۆکس نیوز، رایگەیاند، دڵنیایە ئەم ئیدارەیەی ئێستای ئەمریکا ، پێش هاتنی ٢٠ی کانونی دووەم، براوەی هەڵبژاردنەکان دیاری دەکات، لەگەڵ ئەوەشدا رکابەرەکانی ئەمریکای ئاگادر کردەوە لە ئەنجامدانی هەر هەنگاوێکی دژ بە وڵاتەکە لەم کاتە هەستیارەدا چونکە ترەمپ و تیمەکەی لە حاڵەتی ئامادەباشیدان.

لەبارەی پیرۆزبایی کردنی زۆرێک لە سەرکردەکانی جیهان لە جۆ بایدن بەبۆنەی هەڵبژاردنی وەکو سەرۆکی ئەمریکا، پۆمپیۆ رایگەیاند کە ئەمریکا تەنها یەک سەرۆک و یەک وەزیری دەرەوە و یەکی تیمی نیشتیمانی هەیە، ئەویش مەبەستی ئیدارەکەی ترەمپ-ە.

لە چاوپێکەوتنەکەدا، پۆمپیۆ رەخنەی لە چەند کەسایەتیەکی سیاسی ئەمریکا کرد کە رەتی دەکەنەوە لە پۆستەکانیان بکشێنەوە وەکو جۆن کێری وەزیری دەرەوەی پێشوو و راوێژکاری ئاسایشی نیشتیمانی، سوزان رایس، کە هەردوکیان لە ئیدارەی جۆ بایدن هەوڵی وەرگرتی پۆستەکانیان داوە.