جۆ بایدن رایگەیاند، تاوەکو رۆژی ١١ی سێپتەمبەر سوپای ئەمریکا بە هاوبەشی لەگەڵ هاوپەیمانان بە تەواوی لە ئەفغانستان دەکشێتەوە.

ئەمڕۆ چوارشەممە، ١٤ی نیسان، جۆ بایدن، سەرۆکی ئەمریکا لە وتارێکدا رایگەیاند:" لە ئێستادا هۆکاری مانەوەمان لە ئەفغانستان روون نییە و لە سەرەتای مانگی داهاتووەوە بە هاوبەشی لەگەڵ هاوپەیمانان دەست بە کشانەوەی هێزەکانمان دەکەین لەو وڵاتە و تاوەکو ١١ی سێپتەمبەر تەواوی هێزەکانمان لەو ئەفغانستان دەکشێنینەوە، بەڵام بەردەوام دەبین لە پاڵپشتیکردنی حکومەتی ئەو وڵاتە".

ناوبراو راشیگەیاند:" پێویستە گروپی تاڵیبان ئەوە بزانن ئەگەر لەکاتی کشانەوەمان هێرش بکەنە سەرمان، بەهەموو هێزێکەوە وەڵامیان دەدەینەوە، پاش کشانەوەشمان کار بۆ رێگریکردن لەسەرهەڵدانەوی تیرۆر دەکەین ".

بایدن ئاماژەی بەوەشکرد:" لەسەرەتای دەستێوەردانی سەربازی ئەمریکا بۆ ئەفغانستان تاوەکو ئێستا دوو هەزار و ٣٠٠ سەربازی ئەمریکی کوژراون و ئەو پرۆسەیەش زیانی چەندین ملیار دۆلاری بە ئەمریکا گەیاند ".