بەهۆی بچڕانی بەستەرەی ئەژنۆیەوە، ئەم وەرزە بە تەواوەتی بۆ گاڤی یاریزانی یانەی بەرشەلۆنە کۆتاییهات.
فابریزیۆ رۆمانۆی ئیتاڵی و رۆژنامەنووسی بەناوبانگی بواری تۆپی پێ رایگەیاند:" گاڤیی ئیسپانی و یاریزانی یانەی بەرشەلۆنە، لە بەستەری ئەژنۆیدا تووشی بچڕان بووە".
ئاماژەی بەوەشکرد:" پشکنینە پزیشکییەکان ئاشکرایانکردووە، چارەسەرکردنی پێکانەکەی ماوەی حەوت بۆ نۆ مانگ دەخایەنێت".
هاوکات یانەی بەرشەلۆنە لە بەیاننامەیەکدا ئاشکرایکرد، یاریزانەکە  نەشتەرگەری بۆ ئەنجامدەدرێت و لەژێر چاودێری پزیشکیشدا دەبێت.
شایەنی باسە سەرچاوە هەواڵییەکان باس لەوەدەکەن، پێکانەکەی گاڤی هەمان ئەو پێکانەیە کە لە رابردوودا تووشی رۆناڵدۆی بەڕازیل ببوو.