سەرەڕای گرژییەکان عەبدوڵا حاجی مەحمود دەڵێت: بەشداری کۆنگرە دەکەم

کوردستان پێش 3 هەفتە

Alternate Text

لە لێدوانێکی تایبەتیدا بۆ BMC ئاشکرایکرد، سبەی بەشدار دەبێت لە کۆنگرەکەی پارتی سۆسیال دیموکراتی کوردستان.
عەبدوڵا حاجی مەحمود جێگری سەرۆکی پارتی سۆسیال دیموکراتی کوردستان بە BMC راگەیاند:" سەرۆکی پارتی سۆسیال دیموکرات بڕیارێکی ناپەیڕاوی دابوو لەسەر من و کۆمەڵێک لە هەڤاڵانم بە مەبەستی دوورخستنەوەمان لە حزبەکە، ئێمەش رێککاری یاساییمان گرتەبەر و لە رێگەی کۆمسیۆنەوە سەرجەم بڕیارەکانمان هەڵوەشاندەوە کە نایاسایی بوون".
ئاماژەی بەوەشکرد:" دواتر بەپەلە و بۆ ئەوەی کاری ناحزبی و ناپەیڕەوی دیکە ئەنجامبدەن، ئەنجامدانی کۆنگرەیەکی نائاساییان راگەیاند، وێڕای ئەوەی کە کۆنگرە رێککاری خۆی هەیە، بەڵام ئێمە وتم هەر بەشداری دەکەین لە کۆنگرەکەدا کە بڕیارە سبەی پێنجشەممە بەڕێوەبچێت".
باسی لەوەشکرد:" لە ماوەکانی رابردوودا کەسانێک ماڵەکەی منیان لە گوڵەخانە دەستبەسەردا گرتبوو، لە رێگەی کۆمەڵایەتی و یاساییەوە هەوڵی بەدەستهێنانەوەی ماڵەکەمانم دا، بەڵام بێسوود بوو، تەنانەت چەندجارێک داادوەر داوای پشکنینی خانووەکەی کردبوو، بەڵام رێگە بە ئەنجامدانی ئەو کارەش نەدرا".
عەبدوڵا حاجی مەحمود روونیشیکردەوە:" دوێنێ کوڕەکەم بە مەبەستی ئامادەکاری بۆ کۆنگرە و پاککردنەوەی ماڵەکە چووبووە ماڵەکەمان و دواتر هێزێکی زۆر نێردراوەتە سەر کوڕەکەم و ئەو کەسانەی لەگەڵیدا بوون و دەستیان بە تەقە کردووە، ئەمانیش بۆ پاراستنی گیانی خۆیان وەڵامیان داونەتەوە".
وتیشی:" سبەی ئامادەی کۆنگرەکە دەبم، هەرچەندە داوای دواخستنی ئەو کۆنگرەیەمان کردووە، چونکە کۆنگرەیەک تیایدا ژمارەیەکی زۆر لە هێزی سەربازی ئامادەبن رەنگە چارەنووسی باش نەبێت".




ئه‌مانه‌ش ببینه

‌‌مەڵتیمیدیا