بابەتە سەرەکیەکە: قوباد تاڵەبانی جێگری سەرۆک وەزیران پێشوازی لە پاتریک دۆرێل، باڵیۆزی فەڕەنسا لە عێراق کرد و دۆخی سیاسی ناوخۆی هەرێمیان تاوتوێکرد.

راگەیەندراوی فەرمی: نوسینگەی راگەیاندنی قوباد تاڵەبانی جێگری سەرۆک وەزیران بڵاویکردەوە: کۆبوونەوەکە ئەمڕۆ سێشەممە لە هەولێر بە ئامادەبوونی یان برێم، کونسوڵی گشتیی فەڕەنسا بەڕێوەچوو بەبۆنەی بەڕێوەچوونی رێوڕەسمی یادی سەد ساڵەی لە دایکبوونی دانیێل میتران لە پایتەختی هەرێمی کوردستان.

ئەمەش هەیە: قوباد تاڵەبانی ئاماژەی بە گرنگیی کەسایەتیی دانیێل میتران لای گەلی کورد کرد و رایگەیاند لە سەردەمێکدا میتران دۆست و پشتیوان و خەمخۆری گەلی کورد بوو کەس لە جیهاندا ئامادەنەبوو گوێ لە خەم و ئازارەکانی کورد بگرێت و ئەم یادە لە هەولێر پەیامێکی گرنگی تێدایە کە کورد هەرگیز دۆستە راستەقینەکانی خۆی لە یاد ناکات.

هاوکات: هەر لە کۆبوونەوەکەدا باس لە قۆناغی پاش هەڵبژاردنەکانی هەرێمی کوردستان کرا و لەمبارەیەوە، باڵیۆزی فەڕەنسا پیرۆزبایی بەڕێوەچوونی سەرکەوتووانەی هەڵبژاردنەکانی لە گەلی کورد کرد و هیوای خواست هەرچی زووتر لایەنە براوەکان حکومەتی نوێی هەرێم پێکبهێنن.

زیاتر: قوباد تاڵەبانی سەبارەت بەوە وتیشی: هەموو هەوڵێک دەدەن بۆ ئەوەی حکومەتێکی خزمەتگوزاری دادپەروەر لەسەر بنەمای هاوبەشیی راستەقینە پێک بهێنین بۆ ئەوەی بتوانین هەم کێشەکانی رابردوو چارەسەر بکەین و هەم لەڕووی خزمەتکردنەوە لە ئاستی چاوەڕوانی خەڵکی کوردستاندابین.