بابەتە سەرەکییەکە: بافڵ جەلال تاڵەبانی ناوەڕۆکی کۆبوونەوەکەی لەگەڵ محەمەد شیاع سودانی ئاشکرا دەکات.

راگەیەندراوی فەرمی: نوسینگەی راگەیاندنی سەرۆکی یەکێتی نیشتمانی کوردستان بڵاویکردەوە: لە بەشێکی دیدارەکەدا بافڵ جەلال تاڵەبانی وتی، دەیانەوێت هاوبەشی راستەقینە بن لە بەڕێوەبردنی هەرێمەكەیان.

دەقی راگەیەندراوەکەی نوسینگەی راگەیاندنی سەرۆکی یەکێتی:

افڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە محەمەد شیاع سودانی، سەرۆکوەزیرانی عیراق كرد.

لەدیدارێكدا گۆڕانکارییە سیاسی، ئابووری و ئەمنییەکان تاوتوێكران، جەخت لە بەردەوامیی هەماهەنگی و هاریکاریی نێوان لایەنەکانی هەرێم و عیراق بۆ چارەسەرکردنی کێشەکان لەسەر بنەمای دەستوور، هاوبەشیی راستەقینە و رێککەوتنە سیاسییەکان كرایەوە لەپێناو چارەسەركردنی كێشەكان بەتایبەت پرسی مووچە و جێبەجێكردنی بڕیارەكانی دادگای فیدراڵی لەوبارەیەوە.

لەدرێژەی دیدارەکەدا سەبارەت بە پێکهێنانی حکومەتی نوێی هەرێمی كوردستان، هەردوولا جەختیان لە پێویستیی پەلەکردن لە پێکهێنانی حکومەتێکی خزمەتگوزار كردەوە كە پرەنسیپی راستەقینە و هاوبەشیی تێدا پەیڕەو بكرێت، ببێتە مایەی سەقامگیری و وەڵامدەرەوەی خواستی هەموولایەك بێت. لەو رووەشەوە سەرۆك بافڵ رایگەیاند، یەكێتی پەرۆشی پێكهێنانی حكومەتێكی دادپەروەر و دوور لە جیاكارییە لەپێشكەشكردنی خزمەتگوزاریدا، دەمانەوێت هاوبەشی راستەقینە بین لە بەڕێوەبردنی هەرێمەكەمان و هەمووان بە رۆحێكی بەرپرسیارانەوە كار بۆ خزمەتی خەڵكەكەمان و بەهێزتركردنی هەرێمەكەمان بكەین.

لەبەشێکیتری دیدارەکەدا پرسی سەرژمێری و راپەڕاندنی ئەرکە نیشتمانی و چارەنووسسازەکان گفتوگۆیان لەبارەوەکرا و گرنگی دیدی هاوبەش بۆ سەرجەم پرسەکان و بەردەوامیی دیالۆگ و راوێژی نیشتمانیی نێوان لایەنەکان جەختی لەسەرکرایەوە لەپێناو پاراستنی ئارامی و زاڵبوون بەسەر ئاڵنگارییەکاندا.