بابەتە سەرەکیەکە: بافڵ جەلال تاڵەبانی، سەرۆکی یەکێتی نیشتمانی کوردستان لە دەباشان پێشوازی لە ستیڤن بیتنەر، کونسوڵی گشتیی ئەمریکا لە هەرێمی کوردستان کرد.

راگەیەندراوی فەرمی: نوسینگەی راگەیاندنی سەرۆکی یەکێتی بڵاویکردەوە: لە کۆبونەوەکەدا پێشهات و روداوە سیاسی، ئابوری و ئەمنییەکانی ناوچەکە تاوتوێکرا و جەخت لە هەماهەنگی نێوان لایەنەکان و پێویستی پاراستنی سەقامگیری و ئارامی کرایەوە.

ئەمەش هەیە: هەر لە کۆبونەوەکەدا سەرۆکی یەکێتی، لەبارەی هەنگاوەکانی پێکهێنانی حکومەتی نوێی هەرێمی کوردستان رایگەیاند؛ دەربەستانە بۆ باشترکردنی دۆخی هەرێمی کوردستان، ژیانی خەڵکەکەمان و بنیادنانی حکومەتێکی بەهێز لە هەوڵی بەردەوامداین و پەرۆشین بۆ گۆڕانکاری ریشەیی لە بەڕێوەبردنی وڵاتەکەمان بە ویست و بەرژەوەندی هاوڵاتیان.

زیاتر: لەبارەی کێشەکانی بەغدا و هەولێر، بافڵ جەلال تاڵەبانی، جەختی لە چارەسەرکردنی کێشەکان لەسەر بنەمای دەستور و لێکتێگەیشتن و رێککەوتنە سیاسییەکان کردەوە و وتی؛ دەبێت هەمومان بەرپرسیارانە ئەم دۆخە لەبەرچاوبگرین و زەمینەی زیاتر بڕەخسێنین بۆ گەیشتن بە ئەنجامێک کە لە بەرژەوەندی خەڵک وڵاتەکەماندا بێت.