بابەتە سەرەکیەکە: بەڕێوەبەری پاسپۆرتی سلێمانی رایگەیاند، پلانەکانمان بۆ دەرهێنانی پاسپۆرت گۆڕاوە، ئێستا هاوڵاتی بەگوێرەی ئەو کاتەی دیاری دەکات سەردان دەکات.

لێدوانی تایبەت: سالار عەبدوڵا، بەڕێوەبەری پاسپۆرتی سلێمانی لە چاوپێکەوتنێکدا لە بەرنامەی "دیداری تایبەت" بە BMC رایگەیاند: پلانەکانمان بۆ دەرهێنانی پاسپۆرت گۆڕاوە،ئێستا هاوڵاتی بەگوێرەی ئەو کاتەی لە ڕێگەی سیستمە ئەلکترۆنیەکەوە دیاری دەکات سەردان دەکات.

ئەمەشی وت: بەگوێرەی ئەو ئامارانەی لە بەردەستن، لە رۆژی دروستبونی پاسپۆرتەوە، زیاتر لە دو ملیۆن و 255 هەزار هاوڵاتی لە بەڕێوەبەرایەتیەکەمان بون بە خاوەنی پاسپۆرتی جۆری Aـی پێشو و Bـی کە ئەم ئەلکترۆنیە نوێیەی ئێستایە.

زیاتر: تاوەکو ئێستا پێداویستیەکانی تی موبایل، بۆ سیستمی نوێ دابین نەکراوە، بەڵام هەواڵ هەیە لەم نزیکانەدا دابین بکرێت و ئەفسەرانی بەڕێوەبەرایەتیەکەمان خولی فێربون ببینین.

هاوکات: ئەمەش زیاتر بۆ ئەو حاڵەتە خێرایانەیە کە نەخۆش یاخود هاوڵاتییەکە ناتوانێت سەردانمان بکات، ئێمە سەردانی دەکەین و کارەکەی بۆ جێبەجێ دەکەین.

چی تر: لە وەڵامی ئەوەی کە بەڕێوەبەرایەتیەکە کارمەندی کەمی هەیە؛ عەمید سالار وتی؛ کاتێک فەرمانگەکە دامەزرا میلاکەکەی چەند کەسبوە تاوەکو ئێستا هەر ئەوەنەیە و زیادی نەکردوە، لە ئێستاشدا بوین بە پێنج فەرمانگە و کارمەندانی ئێرە بۆ هەر پێنج فەرمانگەکە کاردەکەن.

وتیشی: لە ماوەی چەند ساڵی رابردودا نزیکەی 70 کارمەند خانەنشین بون یاخود دەستیان لەکارکێشاوەتەوە، یان دورخراوەتەوە "فەسڵکراوە"، هەوڵمانداوە کە کەسی دیکە دابمەزرێنین بەڵام بەهۆی ئەو بارودۆخەی ئێستا هەیە جێبەجێ نەبوە.