بابەتە سەرەکییەکە:
جڤاتی نیشتمانی بزوتنەوەی گۆڕان مەکۆی گردی زەرگەتە، بەبۆنەی ساڵیادی راپەڕینەکەی
بەهاری 1991ەوە پەیامێکی بڵاوکردەوە.
دەقی پەیامەکەی جڤاتی
نیشتمانی بزوتنەوەی گۆڕان:
لە یادی 34 ساڵەی راپەڕینی خەڵكی كوردستان-دا
هاوڵاتیانی خۆشەویستی كوردستان
كەسوكاری سەربەرزی شەهیدان
لە 5ی ئاداری ساڵی 1991 داو، 34 ساڵ لەمەوبەر خەڵكی
كوردستان بەپشتیوانی هێزەكانی پێشمەرگە دژی رژێمی بەعس و دامودەزگا داپڵۆسێنەرەكانی
لەشاری رانیەوە یەكەم چەخماخەی راپەڕینیان لێدا و لە ماوەیەكی كەمدا خاكی كوردستانیان
لێ پاككردنەوە، ئەو سەركەوتنە گەورەیەش بەخوێنی چەندین شەهید و برینداری هاوڵاتی
و پێشمەرگە نوسرایەوە.
لەم یادە پیرۆزەدا سەری رێز بۆ خوێنی شەهیدان و بریندارانی
ئەوكات دادەنەوێنین و پیرۆزبایی گەرمیش لە خەڵكی كوردستان دەكات.
لەم یادەدا، پێویستە ئەو راستیە بیر ھەموان بھێنینەوە، کە
(رەوانشاد نه‌وشیروان مستەفا) بە شایه‌تی نەیارەکانیشی ئە‌ندازیاری ئه‌م روداوه
گه‌وره و گرنگه‌ی مێژوی ئێمه‌یه، هه‌ر زو هه‌ستی كرد خه‌ون و ئامانجه‌كانی ئه‌و
راپه‌ڕینه به‌لاڕێدا ده‌برێت، له‌و كاته‌وه به رێگای جیاواز، نوسین و كۆڕ و كۆبونه‌وه،
فشار و چالاکی سیاسیی له‌هه‌وڵی راستكردنه‌وه‌ی باری لاری كۆمه‌ڵانی خه‌ڵك بو له‌ژێر
ده‌ستی شۆڕشگێرانی دوێنێ و ده‌سه‌ڵاتدارانی ئه‌مڕۆدا.
لەكاتێكدا لەهەرێمی كوردستان یادی ئەو راپەڕینە مەزنە دەكەینەوە
كە بەداخەوە زۆرێك لە ئامانجەكانی راپەڕین هێشتا بەدینەهاتون، دوای 34 ساڵ هێشتا
داواكاری خەڵكی كوردستان پێداویستیە سەرەتاییەكانی ژیان و نەهێشتنی گەندەڵی و
نادادی كۆمەڵایەتییە..
بۆ خەڵکی ئەم بەشەی کوردستان، چەندە جێی شانازی و سەربەرزیە
کە ساڵانە یادی ئەو راپەڕین و خرۆشانە جەماوەریەو یەکڕیزیە کەموێنەیەی پێشمەرگەو خەڵک
و چەکدار و رێکخستنەکان و تێکۆشەرانی هەمو لایەنەکان بکرێتەوە، وە بەڕێز و ستایشەوە
یاد لەو تێکۆشەر و شەهید و بریندار و کەسو کاری سەربەرزیان بکرێتەوە، ئاواش مایەی
ئازارە، کە ساڵ دوای ساڵ بەحەسرەتەوە، هەم سەیری ساڵانی دوای راپەرین بکەین، کە ماڵوێرانی
شەڕی ناوخۆ و یەکتر کوشتن و وڵاتکاولکردن بو، هەمیش خراپترین سیستەمی حوکمڕانی لەم
هەرێمدا چەسپێنرا.
چەندە مایەی خۆشحاڵی دەبو کە هەمو ساڵێک، لە یادی راپەڕیندا
هەمو ئەو دەستکەوتانەمان بژماردایە کە لە ئاکامی ئەو راپەڕینە مەزنەدا هاتونەتە
ئاراوە. چەندە جێی شانازی ئەبو ساڵانە لەو یادەدا، قسەمان لە هێزی پێشمەرگەی یەکگرتو،
لە ئاسایشی یەکگرتو، لە دامەزراوەو دەوڵەتداری، لە نەبونی ناعەدالەتی و گەندەڵی و
پارەبەهەدەردان و ساختەکاری بکردایە، باسی ئەو خۆشگوزەرانیەمان بکردایە کە گەنجەکان،
نەوەکانی دوای راپەڕین، لەسایەی نەوەی راپەڕینەوە دەستیان کەوت، هەر لە دەرفەتی
کاری سەربەرزانەو ژیانێکی شایستەی مرۆڤەوە تا خۆشگوزەرانی و خزمەتگوزاری و دامەزراندن
و دڵنیایی ژیانێکی ئاسودەو دور لە دڵەراوکێ.
ئێمە خوازیاری ئەوەین هەموو لایەنە سیاسیەكان بەجیاوازی
بیروڕا و روانینمانەوە و بەگیانی بەرپرسیارێتیەوە كار بۆ بەدیهێنانی ئامانجەكانی
راپەڕین و باشتركردنی بژێوی خەڵكی كوردستان بكەین، بەلەبەرچاوگرتنی ئەوەش كە ئێستا
لەبەردەم گۆڕانکاری و ئاڵەنگاریەکانی رۆژهەڵاتی ناوەڕاست و جارێکی تر دەستپێکردنەوەی
پڕۆسەی ئاشتی و گفتووگۆی دۆزی کوردداین، بەهیواین هەموان دەست لەناو دەست كار بۆ جێبەجێكردنی
خواستەکانی میللەتەکەمان بکەین.
جڤاتی نیشتمانی بزوتنەوەی گۆڕان
مەکۆی سەرەکی - گردی زەرگەتە