لە پەیامێکدا حەلبوسی
رایگەیاند، پێویستە نێردە دیبلۆماسییەکانی وڵاتان دەستێوەردان لەو بابەتانە نەکەن
کە پەیوەندی بەوانەوە نییە.
محەمەد حەلبوسی، سەرۆکی
ئەنجومەنی نوێنەرانی عێراق لە هەژماری فەرمی خۆی لە تویتەر نوسیویەتی:" ئەرکی
نێردە دیبلۆماسییەکان لە عێراق نوێنەرایەتیکردنی وڵاتانی خۆیان و پتەوکردنی
پەیوەندییەکانی نێوان هەردوو وڵاتە".
ئاماژەی
بەوەشکردووە:" پێویستە بەشێک لە نوێنەری ئەو نێردانە ئەرکی خۆیان بەباشی
بزانن و دەستێوەردان لەو بابەتانە نەکەن کە پەیوەندی بەوانەوە نییە، بۆ ئەوەی
هەڵسوکەوتی هاوشێوەیان لەگەڵ بکرێت، پێویستە رێز لە سەروەری خاکی عێراق بگرن".
شایەنی باسە، دوێنێ هەردوو
باڵیۆزی تورکیا و ئێران لەبەغدا لەبارەی لەشکرکێشی تورکیا بۆ نێو خاکی هەرێم
لێدوانی رۆژنامەوانییان دژ بە یەکتر دا.
ئیرەج مەسجدی، باڵیۆزی
ئێران لە بەغدا رایگەیاند:"دەستێوەردانی سەربازی تورکیا لە عێراق
رەتدەکەینەوە و پێویستە بە هیچ جۆرێک هێزەکانی تورکیا نەبنە سەرچاوەی هەڕەشە بۆ
سەر خاکی عێراق و داگیرکردنی".
لە وەڵامدا، فاتح یەڵدز،
باڵیۆزی تورکیا لە عێراق رایگەیاندبوو:"باڵیۆزی ئێران کۆتا کەس دەبێت لەبارەی
رێزگرتن لە سەروەری خاکی عێراق وانە بە تورکیا بڵێتەوە".