سەرۆکی یەکێتی نیشتمانی
کوردستان پەیامێکی بەبۆنەی رۆژی شەهیدی حزبەکەیەوە بڵاوکردەوە.
بافڵ جەلال تاڵەبانی
سەرۆکی یەکێتی نیشتمانی کوردستان رایگەیاند:" ئەمڕۆ
بە خۆشەویستی و وەفاداریی هەمیشەییمانەوە یادی شەهیدانی یەكێتی دەكەینەوە و دروود
و سڵاو بۆ دڵسۆزی و خۆڕاگری كەسوكارە سەربەرزەكانیان دەنێرین".
ئاماژەی بەوەشکرد:" یەكێتیی نیشتمانیی كوردستان هەمیشە سیمبولی
خەبات و تێكۆشان بووە لەپێناو كوردستان و هەرواش دەمێنێتەوە، مێژووەكەمان هێندە
زێڕین و درەوشاوەیە، كە هەموو رۆژەكانی ساڵ رۆژی تێكۆشان، فیداكاری و شەهیدبەخشینە
لەپێناو خاكەكەمان و هەڵدانەوەی هەر لاپەڕەیەكی رابردوو، سەروەرییەكی حزبی
شەهیدانی تێدا تۆماركراوە".
باسی لەوەشکرد:" ئێمە خوێنی شەهیدانمان لەیادنەكردووە و لەگەڵ
هەر ناوهێنانێكییاندا دەست لەسەر دڵ دادەنێین، بەئەمەكی و خۆڕاگریی كەسوكاری
شەهیدانمان لەبیرنەكردووە و خۆمان بە قەرزاری هەموو ئەو رۆژانە دەزانین كە سەرباری
رژانی خوێنی رۆڵەكانیان، یەكێتییان لە دڵیاندا هەڵگرت، ئەوان خاوەنی راستەقینەی یەكێتین
و ئێمەش خزمەتكاریان".