پاش ئەوەی راپۆرتە پزیشکییەکان سەلماندنیان کە بەهۆی هەڵەکردن لەکاتی چارەسەرکردنی ماڕادۆنا، ئەستێرەی پێشووی تۆپی پێی ئەرژەنتینی گیانیلەدەستدا، جارێکی دیکە پزیشکانی ماڕادۆنا بە هۆکاری مردنی تۆمەتبارکرانەوە.

میدیاکانی وڵاتی ئەرژەنتین بڵاویانکردووەتەوە:" راپۆرتە پزیشکییەکانی لیژنەی تایبەتمەند بە لێکۆڵینەوە لەهۆکاری گیانلەدەستدانی ماڕادۆنا ئاشکرایانکردووە، دییاگۆ ماڕادۆنا پێش گیانلەدەستدانی گرفتی تەندروستی لە دڵ، گورچیلە، جەرگی هەبووە و هۆکاری سەرەکی مردنەکەی بەهۆی نەخۆشی دڵەوە بووە، کە ساڵانێکە پێوەی دەیناڵاند، بەڵام پزیشکەکانی درکیان بەو نەخۆشییانە نەکردووە و وەک پێویست پشکنینیان بۆ نەکردووە .

لە دۆسیەکەدا حەوت کەس تۆمەتبارکراوە و لێکۆڵینەوەیان لەگەڵ دەکرێت، لەوانیش لیۆبۆلدۆ لۆک، پزیشکی تایبەتی مارادۆنا و دوو پزیشکی دیکەی دەروونی و چوار پەرستار.

ماڕادۆنا لە ٢٥ی تشرینی دووەمی ٢٠٢٠ بە جەڵتەی دڵ کۆچی دواییکرد.