وەزارەتی کارەبا هۆشداری دەدات بەو هاوبەشانەی بە ئەنقەست دەستکاری پێوەری زیرەک دەکەن و دەڵێت، ئەو کەسانەی دەستکاری پێوەری زیرەک بکەن سزای دارایی دەدرێن.
ئەمڕۆ پێنجشەممە ٢١ی تشرینی یەکەم، وەزارەتی کارەبا رایگەیاند:" پێوەری زیرەک بە یەکێک لە سەرکەوتووترین پرۆژەکانی کارەبا دادەنرێت و بە کوالێتییەکی بەرز و بەپێی ئەزموونی چەندین وڵاتی بیانی تاقیکراوەتەوە و چەندین سوودی بۆ هاوڵاتییان هەیە".

کەسانێک بە مەرامی خراپ پڕوپاگەندەی دوور لە راستی لە سۆشیال میدیا بڵاودەکەنەوە

ئاماژەی بەوەشکرد:" کەسانێک بە مەرامی خراپ پڕوپاگەندەی دوور لە راستی لە سۆشیال میدیا بڵاودەکەنەوە و بە ئەنقەست دەستکاری پێوەرەکانیان دەکەن، ئەو هاوبەشانەی کارەبا ئاگادار دەکەینەوە کە سەرپێچی لەسەر پێوەری زیرەک ئاشکرایە".

دەبێت تێچووی پێوەرەکە و چاککردنەوەشی لە ئەستۆبگرن

باسی لەوەشکرد:" وێڕای گرتنەبەری رێککاری یاسایی و سزای دارایی ئەو سەرپێچیکارانەی کە بە ئەنقەست دەستکاریی پێوەرەکە دەکەن، دەبێت تێچووی پێوەرەکە و چاککردنەوەشی لە ئەستۆبگرن، چونکە پێوەرەکە بەبێ بەرامبەر بۆ هاوبەشان بەستراوە".
وەزارەتی کارەبا ئەوەشیخستەڕوو:" لەکاتی هەر هەڵەیەکی تەکنیکی یان گرفتێک لە پێوەری زیرەکدا، وەزارەتەکەمان خەرجییەکانی لەئەستۆ دەگرێت، بەپێچەوانەوە هاوبەشەکە دەبێت تەواوی تێچووی چاککردنەوە و دانانی پێوەرێکی دیکە لە ئەستۆ بگرێت، ئەمە جگە لە سزای دارایی".