سەرۆکی پارتی سۆسیال دیموکراتی کوردستان رایگەیاند، ئەگەر وەزارەتی پێشمەرگە رێگایان بدات لە ماوەی چەند کاتژمێرێکدا دەگەنە خانەقین.
محەمەد حاجی مەحمود سەرۆکی پارتی سۆسیال دیموکراتی کوردستان لە پەیامێکیدا رایگەیاند:" حکومەتی عێراق سەرەڕای دۆخی خراپی و بێ سەروبەری نەمانی شیرازەی وەک دەوڵەت، وا بۆ ساڵێک دەچێت هەڵبژاردنی عێراق کراوە، بەڵام تاوەکو ئێستا نەتوانراوە حکومەت پێکبهێندرێت".
ئاماژەی بەوەشکرد:" لەگەڵ ئەو دۆخە خراپەشدا، ئەوان هێشتا کوردیان لەبیرنەچووە، وەزیری نەوت و دادگا زەلیلەکانیان هەر رۆژە و هەڕەشە و کێشە بۆ هەرێم دروستدەکەن، لە ناوچە دابڕاوەکانیش کورد لەسەر ماڵ و موڵکی باوباپیرانیان دەردەکەن".
باسیلەوەشکرد:" وەک روونە لە شاری خانەقین هێزە عێراقییەکان هەڕەشە و سیاسەتی بە عەرەبکردن لە دژی کورد ئەنجام دەدەن، بۆیە داوا لە وەزارەتی پێشمەرگە دەکەین رێگای هێزەکانی پارتی سۆسیالیست بدەن لەماوەی چەند کاتژمێرێکدا دەگەینە خانەقین و رێگا نادەین بێگانە پۆستاڵی رەشیان لە خانەقین جێگیربێت".