بافڵ جەلال تاڵەبانی
رایگەیاند، بەڕێوەچوونی هەڵبژاردنێكی بێگەرد و سەردەمییانە
كە ببێتە مایەی بەرەوپێشچوونی رەوتی دیموكراسی، پێویستییەكی گرنگە و وێنایەكی
گەشتری هەرێمی كوردستان نیشاندەدات.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان
پێشوازیکرد لە ماوریتزیۆ گرێگانتی، باڵیۆزی ئیتاڵیا لە عیراق و وەفدێکی یاوەری.
بە گوێرەی راگەیەندراوەکە، بافڵ جەلال تاڵەبانی ستایشی رۆڵی
راوێژكارانی سەربازیی ئیتاڵیای لە هەرێمی كوردستان و عیراق كرد لەچوارچێوەی
هێزەكانی هاوپەیمانیی نێودەوڵەتی كە بەشدارییەكی كارایان هەبووە لە هاوكاریكردن و
رێكخستنەوەی هێزە چەكدارەكان.
بەردەوامیی هاریكارییەكانیان فاكتەرێكی بەهێزە بۆ پاراستنی سەقامگیریی ناوچەكە
وتیشی، بەردەوامیی هاریكارییەكانیان فاكتەرێكی بەهێزە بۆ
رووبەڕووبوونەوەی تیرۆر و پاراستنی سەقامگیریی ناوچەكە.
لە راگەیەندراوەکەدا ئەوەش هاتووە:" گۆڕانكارییە سیاسی و
ئەمنییەكانی وڵات و پرسی هەڵبژاردنی پەرلەمانی كوردستان تەوەرێكیتری دیدارەكە بوون
و هەردوولا هاوڕابوون، بەڕێوەچوونی هەڵبژاردنێكی بێگەرد و
سەردەمییانە كە ببێتە مایەی بەرەوپێشچوونی رەوتی دیموكراسی، پێویستییەكی گرنگە و
وێنایەكی گەشتری هەرێمی كوردستان نیشاندەدات ".
ئەوەش خراوەتەڕوو، لە دیدارەكەدا كە میكێلی كامێرۆتا، كونسوڵی گشتیی
ئیتاڵیا لە هەرێمی كوردستان ئامادەبوو، جەخت لە گەشەپێدان و فراوانتركردنی
هاریكارییەكانی نێوان هەردوولا لە بوارە جیاوازەكان كرایەوە بەشێوەیەك لەچوارچێوەی
پاراستنی بەرژەوەندییە باڵاكان و بەها نیشتمانییەكان بێت.