لێپرسراوی ناوەندی یاسایی یەكێتی نیشتمانی کوردستان رایگەیاند، دواخستنی هەڵبژاردن زیان بە پێگەی هەرێمی کوردستان دەگەیەنێت.

تەلار لەتیف لێپرسراوی ناوەندی یاسایی یەكێتی نیشتمانی کوردستان بە BMC راگەیاند:" ئێمە هەمیشە لەگەڵ ئەنجامدانی هەڵبژاردندا بووین و داوامانکردووە کە لەکاتی دیاریکراوی خۆیدا هەڵبژاردن ئەنجام بدرێت".

کارمان بۆ ئەوە کردووە هیچ بیانوویەکی سیاسی نەبێتە هۆی دواخستنی هەڵبژاردن

ئاماژەی بەوەشکرد:" هاوکات هەمیشە کارمان بۆ ئەوە کردووە هیچ بیانوویەکی سیاسی نەبێتە هۆی دواخستنی هەڵبژاردن، چونکە دواخستنی هەڵبژاردن لە رووی سیاسی و یاساییەوە زیان بە پێگەی هەرێم دەگەیەنێت".

وتیشی:" ئێمە لەگەڵ ئەوەداین پێکهاتەکانی هەرێمی کوردستان نوێنەری راستەقینەیان هەبێت نەک نوێنەری حزبی دیکەبن".