بابەتە سەرەکیەکە: قوباد تاڵەبانی جێگری سەرۆکوەزیرانی هەرێم پێشوازی لە ئەرمان تۆپجو، کونسوڵی گشتی تورکیا کرد و لە کۆبونەوەی نێوانیاندا چەند پرسێکی جێی بایەخی هەردولا تاوتوێکران.

راگەیەندراوی فەرمی: نوسینگەی راگەیاندنی جێگری سەرۆکوەزیرانی هەرێم بڵاویکردەوە: لە بەشێکی کۆبونەوەکەدا کە ئەمڕۆ چوارشەمە لە هەولێر بەڕێوەچو، لەبارەی دواگۆڕانکارییە سیاسی و ئەمنییەکانی ناوچەکەوە ئاڵوگۆڕی بیروڕا کرا و لەم چوارچێوەیەدا قوباد تاڵەبانی جەختی کردەوە؛ پێویستە هەمو لایەنەکانی ناوچەکە بەرپرسیارانە هەنگاو بنێن.

زیاتر: لە تەوەرێکی دیکەدا باسی دۆخی هەرێمی کوردستان و گفتوگۆکانی پێکهێنانی حکومەتی نوێی هەرێم کرا، لەم بارەیەشەوە، جێگری سەرۆکوەزیران ئاماژەی بە گفتوگۆکانی یەکێتی و پارتی-دا و رونی کردەوە کە تیمە تەکنیکییەکان گفتوگۆکانیان تەواو کردەوە و بەهیواین لە ماوەیەکی نزیکدا بگەنە رێککەوتن بۆ پێکهێنانی حکومەتێک کە لە ئاستی چاوەڕوانی هاوڵاتییانی هەرێمدابێت.

چی تر: سەبارەت بە پەیوەندییەکانی نێوان هەرێم و بەغداش، قوباد تاڵەبانی ئەوەی خستەڕو، بۆ چارەسەرکردنی ریشەیی کێشە داراییەکان، هەنگاوی زۆر باش نراوە و لە دوای پەسندکردنی هەمواری یاسای بودجەش زەمینەی لەبار دروستبوە بۆ چارەسەرکردنی کێشە و ناکۆکییەکانی دیکەی نێوان هەرێم و بەغدا.