بابەتە سەرەکیەکە: پارێزگاری کەرکوک رایگەیاند، خۆشبەختانە پرۆسەی سەرژمێری لەکەرکوک بە باشی و تەندروست بەڕێوەدەچێت و هیچ رێگریەک لە هاوڵاتیان نەکراوە بۆ گەڕانەوەیان.

لێدوانی فەرمی: رێبوار تەها پارێزگاری کەرکوک لەکۆنگرەیەکی رۆژنامەوانیدا رایگەیاند: ئەمڕۆ سەردانی لیژنەی باڵای ناوەندیمان کرد بۆ ئەوەی لە نزیکەوە چاودێری کارەکانی ئەو بژمێرانە بکەین کە لەشاری کەرکوک کارەکانیان ئەنجام دەدەن و سوپاسی هەوڵ و ماندووبونیان دەکەین.

ئەمەشی وت: لە 7:00ی بەیانی ئەمڕۆ پرۆسەی سەرژمێری گستی دەستیپێکردووە و تا 12:00ـی ئەمشەو و سبەینێش بەردەوامی دەبێت، سوپاسی هێزە ئەمنیەکان و دەزگا میدیییەکان دەکەین و هەوڵ و ماندوبونەکانتان بەشێکە لەسەرکەوتنی پرۆسەکە، نیشانی دەدەن چەند بە ئارامی و بێکێشە بەڕێوەدەچێت.

چی دیکە: لەژووری ئاگاداربوونەوە ئاگامان لە هەموو پرۆسەکەیە بەراستەوخۆ و وردیەکی زۆرەوە، سەرجەم شوێنەکان بەرپرسی دیاریکراومان بۆ داناون بۆ ئاگاداربوون لە پرۆسەکە و خۆشبەختانە پرۆسەکە لەکەرکوک بە تەندروستی بەڕێوەدەچێت.

زیاتر: لەئێستادا سەردانی هەموو شوێنەکان دەکەین و چاودێری پرۆسەکە دەکەین و نامەوێت مافی هیچ کەرکوکییەک بفەوتێت، هەروەها رێگری لە کەس نەکراوە بێتەوە بۆ ناوچەکانی خۆی بۆ سەرژمێری.