هەرچەندە خۆشۆردن بە یەکێک لە بنەماکانی ژیانی ئاسایی
دادەنرێت و سودێکی زۆری تەندروستی بۆ لەشی مرۆڤ هەیە، بەڵام بەشێک لە توێژینەوەکان
ئاشکرایانکردووە خۆشۆردنی رۆژانە زیانی هەیە.
ماڵپەڕی "ئێکپرێس"ی تایبەت بە بواری تەندروستی
لە زاری دکتۆر کرێس، پسپۆری نەخۆشییەکانی پێست بڵاویکردووەتەوە:" رەنگە
خۆشۆردنی رۆژانە زیان بە پێستی مرۆڤ بگەیەنێت، بەتایبەت ئەگەر بە ئاوی گەرم خۆت
بشۆیتەوە، لەبەر ئەوەی لە پێستدا کۆمەڵێک بەکتریای سوودبەخش هەن و خۆشۆردنی زۆر
ئەو بەکتریایانە لەناو دەبات ".
ئاماژەی بەوەشکردووە:" ئەو بەکتریا سودبەخشانە
باڵانسی ئاستی چەوری و بەکتریا و کۆمەڵێک زیندەوەری ورد لەسەر پێست رادەگرێت، ئەگەر
مرۆڤ زیاد لە پێویست خۆی بشوات پێستی وشک دەبێتەوە و لەئەنجامدا کۆمەڵێک بەکتریای
زیانبەخش پێست دەبەزێنن و دەبن هۆی هەوکردن و هەستیاری پێست ".