ئێوارەی ئەمڕۆ بافڵ جەلال تاڵەبانی لە دەباشان پێشوازیکرد لە بۆکان جاف، کە یەکێکە لەو گەنجە کوردانەی رۆڵی گرنگی هەبوو لە زیادکردنی شێوەزاری کوردی سۆرانی بۆ بەشی وەرگێڕانی گۆگڵ و پێی راگەیاند، کە پشتیوانی لە گەنجانی خاوەن بیرۆکەی داهێنەرانە دەکات.
نووسینگەی راگەیاندنی بافڵ جەلال تاڵەبانی لە راگەیەندراوێکدا ئاماژەی بەوەکرد:" ئێوارەی ئەمڕۆ بافڵ جەلال تاڵەبانی پێشوازی لە بۆکان جاف کە یەکێک بوو لەو کوردانەی رۆڵی هەبوو لە زیادکردنی شێوەزاری کوردی سۆرانی لە بەشی وەرگێڕانی گۆگڵ کرد و لە دیدارەکەدا، ستایشی رۆڵ و ماندووبوونی لە بۆکان جاف و سەرجەم ئەو گەنجە کوردانەی کرد کە رۆڵێکی بەرچاویان هەبووە بۆ زیادکردنی ئەو شێوەزارە لە بەشی وەرگێڕانی گۆگڵ".
یەکێتی پێشوازی و پشتگیری لە بۆکان جاف و هاوشێوەکانی دەکات
ئەوەشیخستەڕوو:" لە دیدارەکەدا، بافڵ جەلال تاڵەبانی ئاماژەی بەوەکردووە، یەکێتی نیشتمانی کوردستان پێشوازی و پشتگیری لە هەموو هەوڵێکی هاوشێوەی هەوڵەکانی بۆکان جاف لە بواری تەکنەلۆجیادا دەکات و دەبێت هەموو لایەنێک پێکەوە پشتگیری ئەو گەنجە زیرەک و داهێنەرانە بکەن و کارئاسانیان بۆ بکەن".
لە زاری بافڵ جەلال تاڵەبانییەوە روونیشیکردەوە:" گەنجان سەرمایەی نیشتمانی ئێمەن و بونیادنانی داهاتوویەکی گەشتر و ئارامتر بەندە بە پاڵپشتی و هاریکاری گەنجە خوێنگەرم و چالاکەکانمانەوە".
جەختیشیکردەوە:" پاڵپشت و پشتیوانی هەموو ئەو گەنجانە دەکەم کە بیرۆکەی داهێنەرانەیان هەیە و دەیانەوێت خزمەت بە کوردستان بکەن".
خزمەتکردنی گەنجە دڵسۆزەکانی نیشتمان بە ئەرکی خۆمان دەزانین
راشیگەیاند:" خزمەتکردنی گەنجە دڵسۆزەکانی نیشتمان بە ئەرکی خۆمان دەزانین و دەرگامان بۆ هەموو هەوڵێکی هاوشێوەی هەوڵەکانی بۆکان جاف کراوەیە و بە ڕێز و پێزانینەوە لە پێشوازیاندا دەبین".
