بافڵ جەلال تاڵەبانی رایگەیاند، یەکێتی بە هیچ شێوەیەک لەگەڵ دواخستنی هەڵبژاردندا نەبووە.
نوسینگەی راگەیاندنی بافڵ جەلال تاڵەبانی رایگەیاند:" بافڵ جەلال تاڵەبانی، سەرۆکی یەکێتیی نیشتمانیی کوردستان لە سلێمانی پێشوازیکرد لە جێنین پلاسخارت، نێردەی تایبەتی سکرتێری گشتی نەتەوە یەکگرتووەکان لە عیراق".
ئاماژەی بەوەشکرد:" لە دیدارێکدا پێشھات و پەرەسەندنە سیاسییەکان، دۆخی چەقبەستووی سیاسی عیراق و یەکخستنی ھەوڵەکان بۆ دیالۆگ و گفتوگۆی نیشتمانیی تاوتوێکران و بۆچوونیان لەبارەوە خرایەڕوو".
باسیلەوەشکرد:" سەرۆک بافڵ جەلال تاڵەبانی لە دیدارەکەدا جەختی لە چارەسەرکردنی دەستووریانە و سیاسییانەی کێشەکان کردەوە و رایگەیاند، یەکێتیی نیشتمانیی کوردستان پشتگیر و ھەماھەنگە بۆسەرخستنی گفتوگۆی نیشتمانیی بونیادنەرانە بە بەشداری ھەموولایەنە سیاسییەکان کە ببێتە ھۆی دەربازبوونی وڵات لەو دۆخە نەخوازراوەی تێیکەوتووە".
نوسینگەی راگەیاندنی بافڵ جەلال تاڵەبانی روونیشکردەوە:" لە بارەی دۆخی ھەرێم، پرسی ھەڵبژاردن و ئەگەرەکان بافڵ جەلال تاڵەبانی ھەڵوێستی یەکێتیی نیشتمانیی کوردستانی خستەڕوو و وتی، یەکێتی بەھیچ شێوەیەک لەگەڵ دواخستنی ھەڵبژاردن نەبووە، بەڵکو دەیانەوێت یاسایەکی سەردەمیانەمان ھەبێت کە لەگەڵ دۆخی ھەرێم بگونجێت و کۆدەنگی نیشتمانیی لەسەربێت چونکە پرسێکی وەھا گرنگ و چارەنووسساز پێویستی بە سازان و رێککەوتنی ھەموولایەنەکانە".