ئەمینداری گشتی بزوتنەوەی بابلیون رایگەیاند، سەرەتای پەیوەندیی و یەکترناسینی لەگەڵ بافڵ جەلال تاڵەبانی پەیوەندییەکی ئەمنی بووە، لەبەر ئەوەی هەردووکیان پێشتر کەسایەتی سەربازی بوون.

رەییان کلدانی، ئەمینداری گشتی بزوتنەوەی بابلیون لە دیدارێکی تەلەفزیۆنیدا ئاماژەی بەوەکردووە:" پەیوەندیی نێوان من و بافڵ جەلال تاڵەبانی برایانەیە و ئەوەی دەمانبەستێتەوە بەیەکەوە شەهیدێکە کە ناوی ناهێنم ".

ئەوەشی خستووەتەڕوو:" بافڵ جەلال تاڵەبانی هەرگیز لە کۆبوونەوەکانیدا باسی بەرژەوەندی تایبەتی نەکردووە و لە عێراقدا پیویستمان بە کەسایەتییەکی لەوشێوەیەیە ".

وتیشی:" لە دوایین کۆبوونەوەی لایەنە عێراقییەکان کە لەلایەن مستەفا کازمی لە بەغدا رێکخرابوو، بافڵ جەلال تاڵەبانی وتی من بە نوێنەرایەتی مەسعود بارزانیش هاتووم ".

ئەمینداری گشتی بزوتنەوەی بابلیون باسی لەوەشکردووە:" بافڵ جەلال تاڵەبانی زیاتر بەرگری لە خەڵکی هەولێر دەکات، پێش ئەوەی بەرگری لە خەڵکی سلێمانی بکات و من وەک سەرکردەیەکی راستەقینەی نیشتیمانی لێی دەڕوانم ".