راگەیەندراوێک لەلایەن حکومەتی هەرێمی کوردستانەوە سەبارەت بە پرۆژەیاسای بودجەی عێراق بڵاکرایەوە کە بڕیارە سبەی شەممە لە پەرلەمانی عێراق دەنگی لەسەر بدرێت.
حکومەتی هەرێمی کوردستان لە راگەیەندراوێکدا ئاماژەی بەوەکرد:" ئەو گۆڕانکارییانەی لەلایەن بەشێک لە ئەندامانی لیژنەی دارایی ئەنجومەنی نوێنەرانی عێراق، لە رێککەوتی ٢٥ی ئایار دژی هەرێمی کوردستان، لەسەر پرۆژە یاسای بودە ئەنجامدران نادەستوورین و دژی رێککەوتنی حکومەتی هەرێم و حکومتی فیدراڵییە، هەروەها دژی پرەنسیپەکانی رێککەوتنی حکومەتی ئیدارەی دەوڵەت و بەرنامەی ئەو کابینەیەیە کە لە ئەنجومەنی نوێنەران دەنگیان لەسەر داوە".
روونیشیکردەوە:" ئێمە وەک حکومەتی هەرێم، بەهیچ شێوەیەک ئەم ستەمکاری و پێشێلکردنەی مافەکانی خەڵکی کوردستان قبوڵ ناکەین و پابەندی هیچ بڕیارێکی دیکەش نابین جگە لەو رێککەوتنەی پێشتر لەگەڵ حکومەتی سوودانی کراوە".