لە میانەی کۆبوونەوەیەکیدا لەگەڵ خانەوادەکەی
موراد کانی کوردەیی، بافڵ جەلال تاڵەبانی رایگەیاند، کەیسی ناوبراو مایەی نیگەرانی
ئەوانیشە.
نوسینگەی راگەیاندنی سەرۆکی یەکێتی نیشتمانی
کوردستان رایگەیاند:" بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان
پێشوازی لە خانەوادەی سەربەرزی شەهید موراد کانی کوردەیی کرد".
ئاماژەی بەوەشکرد:" لەدیدارەکەدا بافڵ جەلال تاڵەبانی ستایشی
رۆڵی بنەماڵەی شەهید موراد کانی کوردەیی کرد لە مێژووی خەباتی گەلەکەیان و بەخشینی
چەندین شەهید لەپێناو خاکی کوردستان".
بەگوێرەی راگەیەندراوی سەرۆکی یەکێتی، لە دیدارەکەدا بافڵ جەلال
تاڵەبانی بە خانەوادەی ناوبراوی وتووە:" یەکێتی ماڵی هەمیشەیی ئێوەیە و
پشتیوانتان دەبێت لە بەدیهێنانی دادپەروەری و سەروەریی یاسا، کەیسەکەی ئێوە مایەی
نیگەرانی ئێمەشە و دڵنیابن هەر کەسێک لەپشت شەهیدکردنی موراد کانی کوردەییەوە بێت،
رووبەڕووی دادگا دەکرێتەوە".
لە راگەیەندراوەکەدا ئەوەشهاتووە:" لەبەرامبەردا بنەماڵەی موراد
کانی کوردەیی سوپاس و پێزانینی خۆیان گەیاندەسەرۆکی یەکێتی کە بەردەوام لەگەڵ
بنەماڵەکەیاندا بووە، بەپەرۆشەوە مامەڵەی لەگەڵ کەیسەکە کردووە و پشتیوانبووە بۆ
دۆزینەوەی ئەنجامدەرانی تاوانەکە، وتیشیان، یەکێتی حزبی ئەوانە و لەمەودواش بە
گڕوتینێکی زیاترەوە لە خزمەتکردن بەردەوام دەبن و لەسەر رێبازی پیرۆزی حزبی
شەهیدان بەردەوام دەبن".