رێکخراوێکی سویسڕی ئاشکرایکرد، لە ئەفغانستان ١٨ کارمەندیان لەلایەن هێزەکانی تاڵیبانەوە دەستگیرکراوە و تاوەکو ئێستاش هۆکارەکەی نازانن.
نوێنەری هاوکاری نێودەوڵەتی کە رێکخراوێکی ناحکومی سویسڕییە رایگەیاند:" دەسەڵاتدارانی تاڵیبان لە ئەفغانستان ١٨ کارمەندی رێکخراوەکەمانیان لە پارێزگای غور دەستگیرکردووە".
ئاماژەی بەوەشکرد:" تاوەکو ئێستا هیچ زانیارییەکمان لەبارەی ئەو تۆمەتەوە بەدەستنەگەیشتووە کە بووەتە هۆی دەستگیرکردنی کارمەندەکانمان و بۆیە ناتوانین لێدوان لەبارەی بارودۆخەکەوە بدەین".
باسیلەوەشکرد:" هەر تۆمەتێک بخرێتە پاڵ رێکخراوەکەمان یان کارمەندێکمان، راستەوخۆ بەدواداچوون دەکەین و چاوبە هەر بەڵگەیەکدا دەکەین کە خرابێتەڕوو".
شایەنی باسە تاوەکو ئێستا دەسەڵاتدارانی تاڵیبان هیچ روونکردنەوەیەکیان لەبارەی دەستگیرکردنی ئەو کەسانەوە بڵاونەکردووەتەوە.