جێگری سەرۆکی هەرێمی کوردستان رایگەیاند، شەهیدکردنی
پێشمەرگەکانی دژەتیرۆر تاوانێکی تیرۆرستییە و دوژمنانی کوردستان ئامانجیانە ئارامی
و سەقامگیری هەرێم تێکبدەن.
جەعفەر شێخ مستەفا، جێگری سەرۆکی هەرێمی کوردستان لە
کۆنگرەیەکی رۆژنامەوانیدا ئاماژەی بەوەکرد:" ئەو پێشمەرگانەی بەڕێوەبەرایەتی
دژەتیرۆ کە دوێنێ لە هێرشەکەی عەربەتدا شەهیدبوون، بەردەوام لە سەنگەری
بەرگریدابوون بۆ پاراستنی ئارامی و ئاسایشی کوردستان ".
ئەوەشی خستەڕوو:" شەهیدەکان بەشدارییەکی کاریگەر و
گرنگیان هەبووە لە شەڕی دژی داعشدا، دوژمنانی کوردستانیش مەبەستیانە ئارامی و
سەقامگیری هەرێمی کوردستانە تێکبدەن ".
جێگری سەرۆکی هەرێم وتیشی:" عێراق بەرپرسیاری یەکەمە
لە پاراستنی سنوورەکان و دەبێت لەگەڵ حکومەتی هەرێم رێگری بکەن لە دووبارەبوونەی
ئەو هێرشانە ".