پزیشكی پسپۆڕی نەخۆشییە دەروونییەكان لە بارەی خەمۆكی پاش منداڵبوون زانیاری خستەڕوو.
جەعفەر عومەر، پزیشكی پسپۆڕی نەخۆشییە دەروونییەكان لە راگەیەندراوێكدا بڵاویكردەوە:" خەمۆكی یەكێكە لە نەخۆشییە دەرونییە بەربڵاوەكان و جۆرێكی سەرەكی خەمۆكی بریتییە لە خەمۆكی لە دوای منداڵبوون، كە بە خەمۆكی زەیستانیش ناودەبرێت".
باسی لەوەشكردووە:" ئافرەتان دوای منداڵبوون بە گشتی توشی حاڵەتی بێتاقەتی، خەفەت و دڵتوندی دەبن، بەشێوەیەك كە كارناكاتە سەر ژیانی ئاساییان و نیشانەكان لە ماوەی دوو هەفتەی یەكەمدا دەردەكەون و دواتر نامێنن".
باماژەی بەوەشكردووە:" ئەم حاڵەتەش بە نەخۆشی هەژمارناكرێت و زۆربەی ئافرەتان پاش چەند هەفتەیەك ئەو دڵتوندی و بێتاقەتییەیان نامێنێت".
روونیشی كردووەتەوە:" بەڵام هەندێك لە ئافرەتان توشی نەخۆشی خەمۆكی دوای منداڵبوون دەبن كاتێك كە نیشانەكانیان توند دەبن و كاردەكاتە سەر ژیانیان".
نیشانەكان بۆ ناسینەوەی ئەم جۆرە لە خەمۆكی بریتیین لە:
- هەستكردن بە دڵتوندی و گریان.
- توشی خەوزڕان دەبێت و خەوی تێكدەچێت.
- ئیشتیهای خواردنی نامێنێت یان هەندێكجار ئارەزووی خواردنی زۆر دەبێت.
- هێز و وزەی دادەبەزێت و توانای ئیشەكانی رۆژانەی نامێنێت.
- چێژ لە خۆشییەكانی ژیانی نابینێت و ئارەزی هیچی نییە.
- سەبارەت بە منداڵەكەی ناتوانێت پەیوەندی لەگەڵ دروستبكات یان هەندێكجار بیری هەڵە سەبارەت بە منداڵەكەی دێت بە مێشكیدا و دەیەوێت زیانی پێبگەیەنێت.
- ناتوانێت خزمەتی منداڵە تازە لەدایكبووەكە بكات.
- تورەبوون و هەڵچوون و بێئۆقرەیی.
- گۆشەگیری و دابران لە كۆمەڵ و خێزان.
- بیری خۆكوژی و خۆبەكەمزانینی هەیە.
هۆكارەكانی توشبوون زۆرن، بەڵام بە گشتی ئەو ئافرەتانەی كە ئەم خالانەیان تیادایە ئەگەری زیاتریان هەیە توشی خەمۆكی دوای منداڵبوون ببن:
- نەبوونی پشتیوانی كۆمەڵایەتی و هەستوسۆزی.
- بوونی گرفت و نەخۆشی دەروونی لە پێش سكپری.
- بوونی فشاری دەروونی و گرفتی خێزانی.
- سكپرییەكە بەبێ پلان بوبێت و دایباب ئارەزووی منداڵەكەیان نەكردبێت كە بیانبێت.
- لە سكەكانی پێشووتر توشی خەمۆكی بوبێت.
- بوونی نەخۆشی خەمۆكی دوای منداڵبوون لە یەكێك لە خزماندا، وەكو دایكی یان خوشكی.
- منداڵەكە بە نەبەكامی لەدایك ببێت یان كێشەیەكی تەندروستی هەبێت.
- كێشەی هەبێت لەگەڵ هاوسەرەكەی.
بۆ چارەسەری ئەم نەخۆشییە پێویستە سەردانی پزیشكی دەروونی بكرێت بە مەبەستی دەستنیشانكردن و دیاریكردنی جۆری چارەسەر، كە بەگوێرەی كەسەكان دەگۆرێت، هەندێكجار تەنها بە رێنمایی چارەسەر دەكرێت یان لەوانەیە پێویست بە دەرمان بكات هەتا چاكدەبێتەوە.
ئەم نەخۆشییە لەوانەیە ببێتە مەترسی بۆسەر ژیانی منداڵەكە و دایكەكە ئەگەر بە زووی چارەسەر نەكرێت، لەبەرئەوە پێویستە ئەو كەسانە لەژێر چاودێریدا بمێننەوە و پشتیوانی خێزانی و كۆمەڵایەتییان هەبێت.