راوێژکاری ئاسایشی نیشتمانیی عێراق رایگەیاند، لە بەرژەوەندی عێراقە
کە هەرێمی کوردستان بەهێزبێت لە چوارچێوەی عێراقێکی بەهێز و یەکگرتوو.
نوسینگەی رۆژنامەوانی راوێژکاری ئاسایشی نیشتمانیی عێراق ئاماژەی
بەوەکرد:" لە میانەی کارەکانی کۆڕبەندی ئەنتالیا هەریەک لە قاسم ئەعرەجی راوێژکاری
ئاسایشی نیشتمانیی عێراق و نێچیرڤان بارزانی سەرۆکی هەرێمی کوردستان کۆبوونەوە و
پرسەکانی ئاسایش و وزەیان تاوتوێکرد ".
ئەوەش خراوەتەڕوو:" لە کۆبوونەوەکەدا هەردوولا باسیان لە گرنگیی
هاوئاهەنگیی نێوان عێراق و هەرێمی کوردستان کرد و ئەعرەجی جەختی لەوە کردەوە کە لە
بەرژەوەندیی عێراقە، هەرێمی کوردستان بەهێز بێت و جەختیان لە وتاری نیشتمانیی
هاوبەش کردەوە کە لە بەرژەوەندیی سەقامگیریی سیاسی هەموو لایەنەکاندایە."