وەزیری دەرەوەی ئیسڕائیل زانیاری لەبارەی بژاردەكانی وەڵامدانەوەی هێرشەكانی ئێران بۆسەر وڵاتەكەی بڵاوكردەوە.
ئیسڕائیل كاتز، وەزیری دەرەوەی ئیسڕائیل لە لێدوانێكدا رایگەیاند:" بژاردەی یەكەمی وەڵامدانەوەی هێرشەكانی ئێرانمان دەستپێكردووە و یەكەمین وەڵامیشمان بژاردەی وەڵامدانەوەی سیاسی دژ بە تاران دەبێت".
لەم رێگایەوە هەژموونی نەرێنی و تیرۆریستی ئێران كۆتایی پێدەهێنین
وتشی:" ئەم بژاردەیەی وڵاتەكەمان یەكێكە لە هەنگاوەكانی وەڵامدانەوەی هێرشەكانی تاران و دەمانەوێت لەم رێگایەوە هەژموونی نەرێنی و تیرۆریستی ئێران كۆتایی پێبهێنین".
سوپای پاسداران دەخەینە لیستی تیرۆرەوە
ئەوەشیخستەڕوو:" بەشێوەیەكی خێرا هەژموونی خۆمان بەسەر تاران دەسەپێنین و هەوڵەكانمان بۆئەوەی سوپای پاسدارانی ئێران بخەینە لیستی تیرۆرەوە دەستپێكردووە لۆبییەكی بەرفراوانی نێودەوڵەتیش پاڵپشتی ئەم هەنگاوەمانە".
سزای نوێ و توند بەسەر تاراندا دەسەپێنین
لەلای خۆشییەوە وەزارەتی گەنجینەی ئەمریكا رایگەیاند:" پاڵپشتی لە تەواوی هەنگاوەكانی ئیسڕائیل دەكەین و ئێران رۆژهەڵاتی ناوەڕاستی بەتەواوەتی كردووەتە وێرانە و دەبێت سنورێكی بۆ دابندرێت و سزای نوێ و توند بەسەر تاراندا دەسەپێنین".