بابەتە سەرەکییەکە: 56 ساڵ بەسەر دامەزراندنی زانکۆی
سلێمانیدا تێدەپەڕێت و سەرۆکی زانکۆکەش پەیامێکی بڵاوکردەوە.
چی وت: کۆسار محەمەد سەرۆکی زانکۆی سلێمانی رایگەیاند: زانکۆکەمان
رۆڵێکی گرنگی لە بزاوتی سیاسی و رزگاریخوازی گەلی کورد هەبووە بۆیە هەمیشە چقڵی
چاوی دوژمنان بووە.
دەقی پەیامەکەی سەرۆکی زانکۆی سلێمانی:
بەبۆنەی یادی ٥٦ ساڵەی دامەزراندنی زانكۆی سلێمانییەوە، سەرۆكی زانكۆی
سلێمانی پیرۆزبایی تایبەت ئاڕاستەی زانستخوازان و سەرجەم مامۆستایان و
فەرمانبەران و خوێندكارانی زانكۆی سلێمانی دەكات، كە ئەمە دەقەكەیەتی:
٥٦ ساڵ
لەمەوبەر و لە(٢٣ی تشرینی یەكەمی ١٩٦٨)دا، زانكۆی سلێمانی وەك یەكەم زانكۆ لەسەر
ئاستی كوردستان بەمەبەستی پەرەپێدانی زانست و بەرهەمهێنانی مەعریفە و
پەروەردەكردن و بەرەوپێشبردنی تاكەكانی كۆمەڵگەكەمان دامەزرا. ئەم زانكۆ شكۆدارە
بوو بە هەوێنی كردنەوەی دەیان زانكۆی دیكە و ڕووناككردنەوەی هەموو شارەكانی
هەرێمی كوردستان بە چرای زانست و ڕووناكبیری و بەرزكردنەوەی ئاستی هۆشیاری
تاكەكانی كۆمەڵگەی كوردەواری، هەر ئەمەش وایكرد، كە زانكۆی سلێمانی نازناوی
(زانكۆی دایك)ی پێببەخشرێت.
زانكۆی سلێمانی نەك هەر تەنیا ناوەندێك بوو بۆ هۆشیاركردنەوە و
پێگەیاندنی تاكی كورد لەڕووی مەعریفە و گۆڕینی ڕەوتی ژیانی كۆمەڵگەی كوردی بەرەو
پێشكەوتن و شارستانیەت، بەڵكو ڕۆڵێكی گرنگیشی لە بزاوتی سیاسی و ڕزگاریخوازی
گەلی كورددا هەبوو، بۆیە هەمیشە چقڵی چاوی دوژمنان و ڕژێمی بەعس بوو، هەر بە
بڕیاری ئەو ڕژێمە لە ساڵی ١٩٨١-١٩٨٢ زانكۆی سلێمانی گواسترایەوە بۆ شاری هەولێر و
ناوەكەشی بۆ زانكۆی سەڵاحەدین گۆڕدرا. بەڵام دوای ڕاپەڕینی گەلی كورد لە ساڵی
١٩٩١، بە هەوڵ و هیمەتی دڵسۆزان و خەمخۆرانی زانست و زانیاری و بە كۆمەكی
خەڵكی شاری سلێمانی بەتایبەتی و كوردستان بە گشتی، زانكۆی سلێمانی لە ساڵی ١٩٩٢
جارێكی دیكە دامەزرایەوە. سەرەتای بنیاتنانەوەی مەعریفە لەم زانكۆ ئازیزەدا بە
كۆلێژەكانی (زمان، كشتوكاڵ، پزیشكی) دەستیپێكرد و ساڵ بە ساڵ ژمارەی كۆلێژ و بەش
و مامۆستا و خوێندكاری زیاتری لەخۆگرت، بەجۆرێك كە ئێستا خاوەنی (٢١) كۆلێژ و (٨٤)
بەشی زانستی و نزیكەی (٢٠ بۆ ٢٤) بەڕێوەبەرایەتی و سەنتەر و ئۆفیسی گرنگە و لە
ساڵی نوێی خوێندنیشدا چوار بەشی نوێ بەمیتۆد و پڕۆگرامی هاوچەرخ دەكرێنەوە.
مایەی شانازییە؛ زانكۆی سلێمانی وێڕای ئەوەی یەكێكە لە گەورەترین
زانكۆكانی كوردستان و چەندین ساڵە لە لوتكەی زانكۆكانی كوردستان و عێراقدایە،
ئەمساڵ سەركەوتنێكی ناوازەی ئەكادیمی و مێژووی تۆماركرد و پلەی یەكەمی لەسەر
ئاستی هەرێمی كوردستان و عێراق بەدەستهێنا، ئەمەش دەرئەنجامی ئەو پلانە تۆكمە
زانستی و ئەكادیمییە بوو، كە ماوەی چەند ساڵێكە لە سەرۆكایەتی زانكۆی سلێمانی بە
هەوڵ و توانای مامۆستایانی ماندوونەناس و توێژەران و فەرمانبەران و
خوێندكارانی ئازیزمان، كاری جدی لەسەر دەكرێت و هەر بە پشتیوانی و هەوڵی لێبڕاوانەی
ئەوان بەردەوام دەبین بۆ مانەوەی زانكۆكەمان لەم ئاستەدا و بەدەستهێنانی دەستكەوتی
زانستی بەرزتر.
لەم بۆنە پیرۆزەدا، جارێكی دیكە دەستخۆشی لە هەموو ئەو كەسانە دەكەین،
كە ڕۆڵی گرنگ و بەرچاویان هەبوو لە كردنەوە و گەشەسەندنی زانكۆی سلێمانی، بەڵێن
دووپاتدەكەینەوە بەگیانێكی دڵسۆزانە و پاراستنی ئەركی زانستی سەرشانمان و بە
پشتیوانی مامۆستایانی كارامە و فەرمانبەرانی بەئەمەك و خوێندكارانی بەتوانا،
بەردەوام دەبین لە پێشخستنی بواری خوێندن و توێژینەوەی زانستی و بەدەستهێنانی
بڕوانامەی نێودەوڵەتی و گەیشتن بەئاستی زانكۆ یەكەمییە جیهانییەكان.
دووبارە یادی دامەزراندنی زانكۆی پێشەنگی سلێمانی (زانكۆی دایك) پیرۆز
بێت.
پرۆفیسۆر دكتۆر كۆسار محەمەد عەلی
سەرۆكی زانكۆی سلێمانی