بابەتە سەرەکیەکە: حکومەتی هەرێمی کوردستان لەبارەی ئەنجامدانی سەرژمێری گشتی و قەدەغەکردنی هاتووچۆ لە ڕۆژانی 20 و 21ی ئەم مانگە، راگەیەنراوێکی بڵاوکردەوە.

راگەیەنراوی فەرمی: لە ڕاگەیەنراوەکەدا هاتووە، قەدەغەی هاتووچۆ لە کاتژمێر 12ی شەوی 19 لەسەر 20ی ئەم مانگە دەست پێدەکات، تاوەکوو کاتژمێر 12ی شەوی 21 لەسەر 22ی تشرینی دووەم.

زیاتر: جووڵەی هاونیشتمانییان و ئۆتۆمبێل لە کاتی جێبەجێکردنی قەدەغەی هاتووچۆ لە نێوان پارێزگا، قەزا و ناحیەکان سنووردار دەکرێت، جگە لە حاڵەتە مرۆیی و زۆر پێویستەکان.

چی تر: لایەنە ئەمنییەکان و سەرجەم بژمێرەکان، بەڕێوەبەری گەڕەک/گوند و یاریدەدەرەکانیان، سەرپەرشتیاران و چاودێران قەدەغەی هاتووچۆ نایانگرێتەوە.

کێی تر: رۆژنامەنووسان و راگەیاندنکاران کە لایەنە فەرمییەکان رێگەیان پێ داوە و هەڵگری باجی ناساندنن لە دوو رۆژی قەدەغەی هاتووچۆدا رێگەپێدراون.

ئەمەش هەیە: سەرجەم ئەو کەسانەی ئێشکگرن لە ناوەندەکانی تەندروستی و خزمەتگوزاری فەرمانگە و دامەزراوە حکومییەکان، بە پێی مۆڵەتی فەرمیی فەرمانگەکە رێگەپێدراو دەبن.