بابەتە سەرەکییەکە: بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە ماکسیم رۆبین، کونسوڵی گشتیی رووسیا لە هەرێمی کوردستان کرد.

راگەیەندراوی فەرمی: نوسینگەی سەرۆکی یەکێتی بڵاویکردەوە: لە دیدارەکەدا پەرەپێدانی پەیوەندییەکان و فراوانکردنی هەماهەنگییەکان لەچوارچێوەی پاراستنی بەرژەوەندییە باڵاکان و سەقامگیریی ناوچەکە جەختیلێکرایەوە.

زیاتر: لە درێژەی دیدارەکەدا، دواین روداوە سیاسییەکانی رۆژهەڵاتی ناوەڕاست و بە تایبەتی دۆخی سوریا گفتوگۆیان لەبارەوە کرا.

چی تر: هەردولکلا لێکتێگەیشتنیان وەک بنەمای چارەسەری کێشەکان و پاراستنی مافی هەمو نەتەوە و پێکهاتەکانی سوریایان لە چوارچێوەی وڵاتێکی سەقامگیردا دوپاتکردەوە.

هاوکات: سەرۆکی یەکێتی ئاماژەی بە سیاسەتی نیشتمانییانەی حزبەکەی کرد بۆ کۆی پرسەکان و وتی: چارەسەری ئاشتییانەی کێشەکان و گەڕانەوە بۆ مێزی گفتوگۆ سیاسەتی کارکردنی ئێمەیە.

ئەمەشی وت: هەر هەوڵێک لەچوارچێوەی پاراستنی مافەکانی گەلی کورد و سەقامگیریی ناوچەکە بدرێت پشتیوانیی لێدەکەین، دۆخی ئەمڕۆی سوریاش پێویستی بە لێکتێگەیشتن و هاوبەشیی راستەقینە هەیە، هیوادارین هەمولایەک بەم رۆحییەتەوە هەوڵ بۆ داهاتوی وڵاتەکە و ژیانی خەڵکەکەی بدەن.

زیاتر بزانە: پێکهێنانی حکومەتی نوێی هەرێمی کوردستان تەوەرێکیتری دیدارەکە بو و  بافڵ جەلال تاڵەبانی رایگەیاند: گۆڕانکاری ریشەیی لە پرۆسەی حوکمڕانی پێویستییەکی گرنگی قۆناغەکەیە و پێویستە حکومەتی داهاتو خزمەتگوزارییەکانی بەشێوەیەکی دادپەروەرانە پێشکەش بکات و ئامانجەکەی بەهێزترکردن و ئاوەدانکردنەوەی کوردستان بێت نەک جیاکاری و قۆرخکردنی دەسەڵات لەپێناو بەرژەوەندییە حزبییەکاندا.،