بابەتە سەرەکیەکە: محەمەد شیاع سودانی سەرۆک وەزیرانی عێراق، لە کۆنفرانسی چاودێری ناوخۆیی لەژێر دروشمی " چاودێری هێڵی یەکەمی بەرەنگاربونەوەی گەندەڵی و پتەوکردنی شەفافیەت " وتارێکی پێشکەشکرد.

چی وت: سودانی رایگەیاند، چاودێری ناوخۆیی بەربەستی یەکەمی بەرەنگاربونەوەی گەندەڵییە بۆ پاراستنی دامودەزگاکانی حکومەت و پاککردنەوەی کارەکانی، ئاماژەی بەوەشکرد لە ساڵی 2024ـدا 12 تریلیۆن دینار بۆ پڕۆژەی خزمەتگوزاری و پارێزگاکان خەرجکراوە.

ئەمەشی وت: ئەو دەستکەوتانەی لە ماوەی دو ساڵی رابردودا بەدەستهاتون هیوا و متمانەیان بە هاوڵاتیان و گەشبینیان بە دەوڵەت بەخشیوە و وڵات لەسەر رێچکە راستەکەیە، گەندەڵی وەکو ڤایرۆسێکە، خۆی دەگۆڕێت و هەوڵی خۆگونجاندن لەگەڵ ئەو رێوشوێنانە دەدات کە لەلایەن دەزگاکانی چاودێری لەدژی دەگیرێنەبەر.

زیاتر: ئێمە چارەسەری یەکلاکەرەوەمان لە کارەکانی حکومەتدا بە شەفافییەت و رونی تەواو و لە چوارچێوەی یاسای دژە گەندەڵی داڕشتوە و بابەتی پشتیوانیکردنی کۆنتڕۆڵی ناوخۆیی و پەرەپێدانی کارەکانی کردۆتە پرسی سەرەکی چوارچێوەی میتۆدی دژە گەندەڵی، ئامانجی سەرەکی حکومەتیش بەرەنگاربونەوەی گەندەڵییە.

چی تر: جەخت لەسەر بەدواداچون بۆ دۆسیەکانی پەیوەست بە گەندەڵی گەورە دەکەینەوە و دەبێت سزای یاسایی بەسەر تاوانباراندا بسەپێندرێت، ئێمە لەپێناو گێڕانەوەی شکۆ بۆ دارایی وڵات کار لەسەر دۆسیەی بچوکی گەندەڵیش دەکەین، چاکسازیکردن مەرجێکی کۆمەڵگەی نێودەوڵەتیە بۆ مامەڵکردن لەگەڵ ئێمە.