بەهۆی کەمی بەنزین و سووتەمەنی لە لوبنان، پزیشکێکی نەخۆشییەکانی
ژنان بەمەبەستی ئەنجامدانی نەشتەرگەرییەکی منداڵبوون بەپەلە لە رێگەی پایسکلەکەیەوە
خۆی دەگەیەنێتە نەخۆشخانە.
زەکی سلێمان، ئەو پزیشکە لوبنانییەیە کە وێنەیەکی بە
جلوبەرگری لێخۆڕینی پایسکلەوە بڵاوکردووەتەوە و منداڵێکی کۆرپەی لە باوەشدایە و
خۆی نەشتەرگەری منداڵبوونەوەکەی بۆ ئەنجامداوە، ئەوەش کاردانەوەی زۆری بە دوای
خۆیدا هێنا.
یەکەم جار نییە ئەو کارە بکەم
سلێمان کە پزیشکی نەخۆشخانەی رزق-زانکۆی لوبنانی
ئەمەریکییە، بە ماڵپەڕی "سکای نیوز"ی راگەیاندووە:" دەمزانی ئەو
منداڵە لەبەرەبەیانی رۆژی شەممەی رابردوو لەدایک دەبێت و بەهۆی ئەو قەیرانەی رووی
لە وڵاتەکەم کردووە، ئۆتۆمبێلەکەم بەنزینی تێدا نەبوو، بۆیە بەناچاری و بەپەلە لە
رێگەی پایسکلەکەمەوە خۆم گەیاندە نەخۆشخانە، ئەمەش یەکەم جار نییە ئەو کارە بکەم
".
ئەو پزیشکە وێنەکەی لەهەژماری تایبەتی خۆی لەفەیسبووک
بڵاوکردووەتەوە و لە پەیامێکدا بۆ منداڵەکە نوسیویەتی:" ئەم وێنەیە هەڵبگرە و
رۆژێک لە رۆژان باوکت پێت دەڵێت کە پزیشکەکەت لەپێناو پاراستنت بە پایسکل هاتووەتە
نەخۆشخانە، لە سەردەمێکدا لەدایکبوویت کە وڵاتەکەت توشی قەیرانی بەنزین و دەرمان و
خواردن و کارەبا بووەتەوە ".