جارێکی دیکە خوێندکارانی ١٢ی ئامادەیی لە سنووری گەرمیان رژانە سەر شەقامەکان و جەختیانکردەوە، تاوەکو داواکارییەکانیان جێبەجێ دەکرێت بەردەوام دەبن لە دەربڕینی ناڕەزایەتی.
یەکێک لە نوێنەرەکانی خوێندکارانی ناڕازی قۆناغی ١٢ی ئامادەیی لە کەلار رایگەیاند:" بارودۆخی ئێستای هەرێم، خۆپیشاندان، بایکۆت، خراپی گوزەرانی مامۆستایانمان و نەبوونی مووچە کاریگەری لەسەر دواکەوتنی ئێمە لە پڕۆسەی خوێندن هەیە، ئەویش هۆکارێکە بۆ لەبارچوونی خەونەکانمان و بەفیڕۆچوونی رەنجی چەندین ساڵەمان".
جەختیلەوەشکردەوە:" لێرەوە رایدەگەیەنین ئێمە وەک خوێندکارانی قۆناغی ١٢ی ئامادەیی بە سەرجەم بەشەکانییەوە، لە ناڕەزایەتییەکان بەردەوام دەبین تاوەکو ئەوکاتەی داواکارییەکانمان جێبەجێ دەکرێت، کە داواکارییەکەشمان یان درێژکردنەوەی پڕۆسەی خوێندنە، یاخود کەمکردنەوەی مەنهەج".