كۆزانیاری دەربارەی كێشەی پڕۆستات لە پیاواندا

تەندروستی پێش 4 هەفتە

Alternate Text

پزیشكی پسپۆڕ و دكتۆرا (بۆردی) بەریتانی لەنەشتەرگەری گورچیلە و میزەڕۆ و نەزۆكی پیاوان زانیاری لەبارەی كێشە، هۆكار و چارەسەرەكانی پڕۆستات لە پیاواندە دەخاتەڕوو.

 ‎ كاوە فەقێ رەحیم، پزیشكی پسپۆڕ و دكتۆرا (بۆردی) بەریتانی لەنەشتەرگەری گورچیلە و میزەڕۆ و نەزۆكی پیاوان لە راگەیەندراوێكدا بڵاویكردەوە:" پڕۆستات رژێنێكە ئەكەوێتە ملی میزەڵدان لەپیاواندا، قەبارەكەی بە ئەندازەی گوێزێكی كوردییە، پڕۆستات بەس لە پیاوندا هەیە، واتە ئافرەتان پڕۆستاتیان نیە".

ئاماژەی بەوەشكردووە:" ئیشی سەرەكی پڕۆستات یارمەتی دانی كرداری زاووزێیە لە پیاواندا بەهۆی دەردانی هەنێ ئەنزیمەوە كە هاوكاری سەرەكی ئەم پڕۆسەیەن".

- پڕۆستات دوو جۆر كێشە بۆ پیاوان دروست دەكات:
1. هەوكردنی پڕۆستات.

2. گەورەبوونی پڕۆستات.

1. هەوكردن (سۆی)ی پڕۆستات:

 ئەم كێشەیە ئەكرێت گەنج و پیر تووشی ببن، واتە هەر كەسێكی نێر بێت و تەمەنی لە نێوان 16 بۆ 17 ساڵییەوە بێت، ئەگەری تووش بوونی هەیە، (50%)ی پیاوان جارێك یان زیاتر لە تەمەنیاندا تووشی هەوكردنی پرۆستات دەبن.

- نیشانەكانی هەوكردنی پڕۆستات:

 نیشانەكانی نەخۆش بە گوێرەی جۆری هەوكردنەكە دەگۆڕێت، چونكە هەوكردنی پڕۆستات چەند جۆرێكی هەیە:

- هەوكردنی بەكتریایی (التهاب الحاد):

 واتە نەخۆشەكە بەهۆی چوونە ژوورەوەی بەكتریا بۆ ناو پڕۆستات تووش بووە، لەم جۆرەیاندا نەخۆشەكە هەست بە سووتانەوە و ئازارێكی زۆر دەكات لە بۆری میزدا لە كاتی میزكردندا، نەخۆش تووشی میزە چركە دەبێت و لەوانەیە میزی بگیرێت و میزی بۆ نەكرێت، زۆرجار نەخۆشەكە لەرزوتایەكی زۆری دەبێت و بارودۆخی ناجێگیردەبێت و پێویست دەكات لە نەخۆشخانە داخڵ بكرێت بۆ چارەسەركردن.

- هەوكردنی درێژخایەن (التهاب المزمن):

 لەم جۆرەیاندا نیشانەكانی نەخۆشەكە وەك هەوكردنی بەكتریایی قورس نین، لەوانەیە كزانەوەیەكی كەمی هەبێت لەكاتی میزكردن یان سەرجێی كردندا، هەندێكجار نەخۆش هەست بە ئازارێكی بێزاركەردەكات لە نزیك كۆم و گوونەكان و بەرمووسەڵدانی، نەخۆش لەوانەیە ئارەزوی جووت بوونی كەم بێتەوە، ئەم جۆرە زۆرترە لە جۆری یەكەم و نەخۆش لەوانەیە چەند مانگێك بۆ چەندساڵێك پێوەی گیرۆدەببێت.

- دەستنیشان كردنی نەخۆشییەكە:

 نەخۆش دەبێت لەنزیكەوەببینرێت و پرسیاری تەواوی لێبكرێت دەربارەی نیشانەكانی نەخۆشیەكە و پاشان پشكنینی جەستەیی بۆ بكرێت لەگەڵ پشكنینی پڕۆستات بە پەنجە لە كۆمەوە.

پاشان پشكنینی خوێن و میز، زەرعەی میز و تۆوی بۆ بكرێت، هەنێكجار پێویست بە پشكنینی زیاتر دەكات وەك سۆنەر و ناڤوری میزەڵدان.

چارەسەرەكان:

چارەسەری هەوكردنی بەكتریایی زۆر جار ئاسانە، ئەویش لەرێگەی پێدانی حەب یان دەرزی گونجاو بۆماوەی مانگێك، هەوكردنەكە كۆتاییدێت و نەخۆش بەتەواوی چاك دەبێتەوە.

بەڵام، چارەسەری هەوكردنی درێژخایەن ئاسان نیە، زۆرجار نەخۆشەكە پاش بەكارهێنانی چارەسەر نیشانەكانی دەست پێدەكەنەوە و پێویست دەكات كە چەند جۆرێك چارەسەری جۆراوجۆر بەكاربهێنێت و نەخۆش دڵنیابكرێتەوە كە نەخۆشی خراپی وەك شێرپەنجەی نیە. 

ئەگەر نەخۆشەكە هەرباش نەبوو پێویستە رەوانەی لای پزیشكی پسپۆڕی ئازاری درێژخایەن بكرێت بۆ چارەسەر.

ئه‌مانه‌ش ببینه

‌‌مەڵتیمیدیا