هۆكار و چارەسەرەكانی قەبزی لە مانگی رەمەزاندا چیین؟!

تەندروستی پێش 3 هەفتە

Alternate Text

پزیشكێكی پسپۆڕی (دكتۆرا) لە نەشتەرگەری ناوسكبینی و قەڵەوی و كۆئەندامی هەرس، زانیاری پێویست دەربارەی هۆكار و چارەسەرەكانی قەبزی لە مانگی رەمەزاندا دەخاتەڕوو.

 حبیب محمود عبدوڵا، پزیشكی پسپۆڕی (دكتۆرا) لە نەشتەرگەری ناوسكبینی و قەڵەوی و كۆئەندامی هەرس، لە راگەیەندراوێكدا بڵاویكردەوە:" رۆژووی رەمەزان هەنێكجار دەبێتە هۆی قەبزی و كێشەی كۆئەندامی هەرس لە هەنێك لە رۆژوەوانان بەتایبەتی ئەوانەی كە كێشەی قەبزیان هەبووە پێش ڕەمەزان".

زۆرجار بەهۆی ئەم قەبزیەوە دووچاری مایەسیری، قڵیشانی كۆم و خوێن بەربوون دەبین

ئاماژەی بەوەشكردووە:" زۆرجار بەهۆی ئەم قەبزیەوە دووچاری مایەسیری، قڵیشانی كۆم و خوێن بەربوون دەبین، بەهۆی تێپەڕبوونی پیسایی و پاشماوەی خواردنی زۆر رەق بەناو ناوپۆشی كۆمدا".

- گرنگترین هۆكارەكانی قەبزی لە ڕەمەزاندا بریتیین لە: 

1. گۆڕانكاری لە جۆری خواردن، ستایل و كاتی خواردن كە هۆكارێكە بۆ گۆڕانكاری لە جوڵەی ریخۆڵەكان و بەتاڵكردنەوەی ریخۆڵەكان.

2. كەمی ئاو خواردنەوە لە كاتی رۆژووبوندا كە ئەبێتە هۆی وشكبوونەوە و هۆكارێكە بۆ رەقبوونی پاشماوەی خۆراك و پیسایی.

3. كەمبوونەوەی جوڵە و چالاكی رۆژانە، لە رەمەزاندا زۆربەی خەڵكی پشوو ئەدات یان لە ماڵەوەن یان كاتەكان بە خەوتن بەسەر ئەبەن، ئەمەش هۆكارێكە بۆ قەبزی.

- چی بكرێت بۆ خۆپاراستن لە قەبزی لە رەمەزاندا:

 1. خواردنەوەی بڕێكی زۆر لە ئاو و شلەمەنی لە نێوان بەربانگ و پارشێودا.

2. گرنگی بدرێت بەو خواردنانەی كە بڕێكی زۆر ریشاڵیان تێدایە وەك سەوزە و میوە.

3. ئەنجامدانی وەرزش و جوڵە و چالاكی بەردەوام.

4. بەكارهێنانی هەندێك دەرمان بۆ ئاسانكاری شلبونەوەی پیسایی. 

5. باشترە كە پارشێو بكرێت، چونكە یارمەتیدەر ئەبێت بۆ رێگریكردن لە وشكبوونەوە.

ئه‌مانه‌ش ببینه

‌‌مەڵتیمیدیا