بابەتە سەرەکیەکە: قوباد تاڵەبانی، جێگری سەرۆک وەزیران پێشوازیكرد لە وەفدێكی سەربازی ئەڵمانیا بە سەرۆكایەتی كۆلۆنێڵ تۆماس ریتەر، فەرماندەی نوێی هێزەكانی ئەڵمانیا لە هەرێمی كوردستان.

راگەیەندراوی فەرمی: نوسینگەی راگەیاندنی جێگری سەرۆک وەزیران رایگەیاند: لە كۆبوونەوەكەدا كە رۆژی سێ شەمە بە ئامادەبوونی هەر یەكە لە شۆڕش ئیسماعیل، وەزیری پێشمەرگە و لیوا بەختیار، ئەمینداری گشتیی وەزارەتی پێشمەرگە بەڕێوەچوو.

ئەمەش هەیە:  قوباد تاڵەبانی پیرۆزبایی لە كۆلۆنێڵ تۆماس ریتەر كرد بەبۆنەی دەستبەكاربوونی وەک فەرماندەی نوێی هێزەكانی ئەڵمانیا لە هەرێمی كوردستان و هیوای سەركەوتنی بۆ خواست لە ئەركەكەیدا، ئامادەی خۆی دەربڕی بۆ هەموو جۆرە هاوكاری و پاڵپشتییەک بۆ هێزەكانی ئەڵمانیا لە هەرێمی كوردستان.

هاوکات: جێگری سەرۆک وەزیران سوپاسی حكومەت و پەرلەمانی ئەڵمانیای كرد كە رەزامەندییان دەربڕیوە بۆ درێژكردنەوەی مانەوەی هێزەكانی ئەو وڵاتە لە هەرێمی كوردستان و عێراق و هەروەها ستایشی ئەڵمانیای كرد كە هەمیشە هاوكار و پشتیوانی هەرێمی كوردستان بووە بە تایبەت لە شەڕی دژی تیرۆر و پرۆسەی ریفۆرم لە هێزەكانی پێشمەرگەدا.

چی دیکە: لە تەوەرێكی دیكەی كۆبوونەوەكەدا گفتوگۆكرا لەبارەی ئاستەنگەكانی بەردەم پرۆسەی ریفۆرم لە وەزارەتی پێشمەرگە لەمبارەیەوە قوباد تاڵەبانی جەختی لەوەکردەوە، كە پێویستە حكومەتی داهاتوو پشتیوانی پرۆسەی ریفۆرم بكات لە هێزەكانی پێشمەرگەدا.

زیاتر: هەر لە كۆبوونەوەكەدا باس لە دۆخی ناوچەكە كرا و قوباد تاڵەبانی رایگەیاند، هێشتا تیرۆر هەڕەشەیەكی جدییە بۆ سەر ئاسایش و سەقامگیری عێراق و ناوچەكە، هەربۆیە پێویستە ئاستی هاوكاری و هەماهەنگی لە نێوان هێزە ئەمنییەكانی كوردستان و عێراق لەگەڵ هاوپەیمانان زیاتر بكرێت.