بابەتە سەرەکیەکە: وتەبێژی حکومەتی عێراق رایگەیاند، سەرۆکوەزیران رێزی هەیە بۆ ئەو هەنگاوە بنیادنەرانەی ئەنجومەنی نوێنەران بۆ پەسەندکردنی هەمواری یاسای بودجە.

لێدوانی فەرمی: باسم عەوای وتەبێژی حکومەتی عێراق رایگەیاند: سودانی پێزانینی خۆی بۆ ئەو هەنگاوە بەرپرسیارانە و بنیادنەرەی ئەنجومەنی نوێنەران دەردەبڕێت، بە پەسەندکردنی هەموارکردنەوەی یاسای بودجەی گشتی عێراق بۆ ساڵانی دارایی 2023، 2024 و 2025، یاسای 13 بۆ ساڵی 2023، بەپێی دەقی ئەو هەموارکردنەوەیە کە لە ئەنجومەنی وەزیرانەوە گەیشتوە.

ئەمەش هەیە: سودانی سوپاسی سەرۆکی ئەنجومەنی نوێنەران و جێگری یەکەمی سەرۆکی دانیشتنەکەی ئەمڕۆ و جێگری دوەمی سەرۆک و سەرۆکی فراکسیۆنەکانی پەرلەمانی کرد، بۆ تێگەیشتن و پاڵپشتیکردنیان لە دیدگای حکومەت کە توانیویانە بەردەوامبن لە جێبەجێکردنی بەرنامەکەی بەپێی ئەولەویەتانەی پێشتر لەلایەن نوێنەرانی گەلەوە پەسەندکرابون کە لەگەڵ خواستەکانی گەلی عێراقدا دەگونجێت.

زیاتر: دەنگدان لەسەر هەموارکردنەکە بەپێی ئەو دەقەیە کە ئەنجومەنی وەزیران پەسەندیکردوە، سەقامگیری سیاسی و ئەو دۆخە لێکتێگەیشتنە دوپاتدەکاتەوە کە تایبەتمەندی ئەم قۆناغەیە، هەروەها رەنگدانەوەی ئاستی بەرزی هاوکاری نێوان حکومەت و ئەنجومەنی نوێنەرانە بۆ بەردەوامبون و پێکەوە کارکردن.

هاوکات: بەمەبەستی درێژەدان بە زەبری چەرخی گەشەپێدان و ئاوەدانکردنەوە و چاکسازی کە دەستیپێکردوە و ناوەستێت حکومەت بەردەوامە لە کارکردن بۆ روبەڕوبونەوەی کێشە و ئاڵنگاریەکان بە هەستکردن بە بەرپرسیارێتی و لەسەر بنەمای بەرژەوەندییە باڵاکانی عێراق.

چی تر: هەروەها سودانی داوایکردوە لە هەردو حکومەتی هەرێمی کوردستان، لەگەڵ دامەزراوە تایبەتمەندەکان و وەزارەتی نەوتی فیدراڵی، دەستبەجێ دەستبکەن و کار لەسەر ئەم هەموارکردنە بکەن، بەمەبەستی وەبەرهێنانێکی گونجاو لە سامانە سروشتییەکان، بە تایبەتی سامانی نەوت و بۆ ئەوەی ئەم سامانە ببێتە هۆکارێک بۆ پشتگیریکردنی سەقامگیری و پاڵنەرێک بۆ جێبەجێکردنی زیاتری پلان و بەرنامەکان کە پێداویستییەکانی گەل دابین دەکەن.