بابەتە سەرەکیەکە: ئەمڕۆ پێنجشەممە،  پێنجەمین كۆنفرانسی ئامادەكاری بۆ دوهەمین دیداری یەكێتی گەیشتە گەرمیان و خانەقین، لە شاری كەلار بەڕێوەچو.

لێدوانی فەرمی: شێخ ئەحمەد حەمەكەریم ئەندامی مەكتەبی سیاسی و لێپرسراوی بازنەی هەڵبژاردنەكانی گەرمیان وتارێکی پێشكەشكرد و رایگەیاند: دیدار بنەمای چاكسازییە لەناو حزبداو دیداری پێشوش بەسەركردایەتی بافڵ جەلال تاڵەبانی، یەكێتی نیشتمانی كوردستانی بردە ئاستی یەكبڕیاری، بەشێوەیەک لەسەر ئاستی جیهانیش گوێ لێگیراوبێت.

ئەمەشی وت: لەچەند مانگی داهاتودا حكومەتی نوێ پێكدەهێنرێت، بۆیە لەم كاتەدا دوهەمین دیدار ئەنجامدەدەین بۆ ئەوەی گوێ لەداواكاری و خواست و بۆچونی كادرەكانمان بگرین و بۆ پێكهێنانی حكومەت سودی لێببینین.

زیاتر: بەڵێن و وتەكانی بانگەشەی هەڵبژاردنمان بوە هۆی بەرزكردنەوەی دەنگەكانی یەكێتی بۆ 420 هەزار دەنگ، كە بەرێژەی دو بۆ دو ئەوەندە و نیو دەنگەكانی یەكێتی زیادیانكردوە و دەبێت خاڵ بە خاڵی بەڵێنەكانیشمان لەپێكهێنانی حكومەتدا جێبەجێ بكرێن، هەروەها ئامانجی یەكێتی ئەوەیە ئەو بەڵێنانەی بە خەڵک و كادرانی خۆیدابو جێبەجێیان بكات.

وتیشی: یەكێتی نیشتمانی كوردستان  سورە لەسەر راستكردنەوەی رێڕەوی چەوتی حكومڕانی لەهەرێمی كوردستان، بۆ ئەوەی حكومەتی داهاتوی هەرێم حكومەتێكی سەركەوتو بێت.

چی تر: یەكێتی جەخت لەسەر جێبەجێكردنی داواكاری و پێشنیاری كادران و تێكۆشەرانی و گرنگیدان بەپرسی ژنان و رەخساندنی هەلی كار بۆ گەنجان دەكات، پێشمانوایە گەرمیان شایستەی خزمەتی زیاترە لەوەی كەبۆی كراوەو پێویستە سوربین لەسەر چاككردنی ئۆرگانەكانی یەكێتی و خزمەتكردنی زیاتری خەڵک.