بابەتە سەرەکیەکە: سەرۆکی فەڕەنسا رایگەیاند، دەبێت چارەنوسی داهاتوی کیشوەری ئەوروپا لەناو کیشوەرەکەدا دیاری بکرێت، نەک لە واشنتۆن و مۆسکۆ.

لێدوانی فەرمی: ئیمانوێل ماکرۆن سەرۆکی فەڕەنسا لە وتارێکدا، جەختی کردەوە لە گرنگی سەربەخۆیی لە بوارەکانی بەرگریی و ئاسایشدا لە کاتێکدا ئەمریکا و روسیا پەیوەندییەکان لەسەر ئاشتی لە ئۆکراینا پتەوکردەوە و لە بەرامبەردا وڵاتانی ئەوروپا ترسیان لەوەی ھەیە کە لە دەرەوەی مێزی گفتوگۆکان، بمێننەوە.

ئەمەشی وت: پێشھاتەکانی جیۆسیاسی لە جیھانیدا، وای کردوە ئاسایش و خۆشگوزەرانی زیاتر نادیار بێت، ھەروەھا ئەو روداوە مێژوییانەی کە لە ئێستادا رودەدەن، بونەتە مایەی نیگەرانی بۆ ھەموان، دەبێت چارەنوسی داهاتوی کیشوەری ئەوروپا لەناو کیشوەرکە دیاری بکرێت، نەک لە واشنتۆن و مۆسکۆ.

هاوکات: سەرۆکی فەرەنسا ئاماژەی بەوەشکرد؛ ھەڕەشەی روسیا کاریگەری لەسەر وڵاتانی ئەوروپا ھەیە، لەنێویاندا فەڕەنسا، ھەروەھا مۆسکۆ جەنگی ئۆکراینای کردوە بە ململانێیەکی جیھانی.

چی تر: جارێکی دیکە جەنگی ئۆکراینا، بونی ھەڕەشەی روسیا بۆ سەر ئاسایشی ئەوروپا دوپاتکردەوە و رایگەیاند؛ مۆسکۆ بەردەوامە لە ئەنجامدانی ھێرشی ئەلیکترۆنی و ھەوڵدەدات بە بڵاوکردنەوەی زانیاری ناڕاست لە تۆڕە کۆمەڵایەتییەکاندا، کاریگەری لەسەر رای گشتی دروست بکات.

زیاتر: رێگای ئاشتی ئەگەر بە ئۆکراینا تێنەپەڕێت، ئەوا بەدی نایەت، ھەروەھا ئاشتی مانای خۆبەدەستەوەدان یان روخانی ئۆکراینا نییە.