بابەتە سەرەکیەکە: دوای کۆتایی هاتنی ئاگربەستی غەززە، بەرەبەیانی ئەمڕۆ، هێرشی ئیسرائیل بۆ سەر ئەو کەرتە دەستیپێکردەوە و وەزیری بەرگری ئیسرائیلیش دەڵێت، دەرگای دۆزەخ دەکەینەوە.

کێ وتی: ئاژانسی هەواڵی رۆیتەرز لە زاری بەرپرسێکی ئیسرائیلییەوە بڵاویکردەوە: هێرشەکان بۆ سەر غەززە تاوەکو پێویست بێت بەردەوام دەبن و هێرشە ئاسمانییەکانیش فراوانتر دەکەین.

لەلایەکی دیکەوە: ئیسرائیل کاتس، وەزیری بەرگری ئیسرائیل رایگەیاند؛ ئەگەر حەماس سەرجەم بارمتەکان ئازاد نەکات دەرگای دۆزەخ بەسەر غەززە دەکەینەوە.

زیاتر: کاتس وتیشی؛ ئێمە گەڕاینەوە بۆ شەڕ، سەرەڕای رەتکردنەوەی حەماس بۆ ئازادکردنی بارمتەکان و هەڕەشەکانی دژی سەربازانی ئیسرائیل.

هاوکات: لەبەرامبەردا بزوتنەوەی حەماس رایگەیاند؛ ئەم کارەی ئیسرائیل ئێستا دەیکات پێشێلکردنی ئاشکرای رێککەوتنی ئاگربەستی غەززەیە و بەهۆیەوە بارمتەکان روبەڕووی چارەنوسێکی نادیار دەکاتەوە.

چی تر: تەندروستیی غەززە رایگەیاند، بەهۆی هێرشە ئاسمانییەکەی ئیسرائیل زیاتر لە 200 هاوڵاتی کوژراون و زیاتر لە 350 کەسی دیکەش بریندارن.