بابەتە سەرەکیەکە: بافڵ جەلال تاڵەبانی، سەرۆکی یەکێتی نیشتمانی کوردستان لە دەباشان پێشوازیکرد لە بەڕێز شێخ مادح شێخ عوسمان نەقشبەندی، کەسایەتی دیاری ئاینی کوردستان و سەرپەرشتیاری خانەقاکانی نەقشبەندی.

راگەیەندراوی فەرمی: نوسینگەی سەرۆکی یەکێتی بڵاویکردەوە: لە دیدارێکدا کە شێخ ئەحمەد حەمە کەریم، ئەندامی مەکتەبی سیاسی ئامادەبو، دوپات لە پێویستی پەرەپێدانی گیانی پێکەوەژیانی ئاینی و ئاشتییانەی نێوان نەتەوە و پێکهاتەکان و پاراستنی بەها باڵا و پیرۆزەکانی ئاینی ئیسلام کرایەوە، بەشێوەیەک هەمو هەوڵەکان یەکبخرێن لەپێناو برایەتی و یەکڕیزی گەلی کورد و زیاتر خزمەتکردنی کۆمەڵانی خەڵک.

زیاتر: هەر لە دیدارەکەدا بافڵ جەلال تاڵەبانی بە گرنگییەوە ئاماژەیدا بە رۆڵی ئەرێنی شێخانی نەقشبەندی و مورید و شوێنکەوتوانیان لە کاری چاکەکاری و خواپەرستی و بەهێزکردنی بیروباوەڕی میانڕەوی و پێکەوەیی رێبازەکان و رایگەیاند؛ یەکێتی بە چاوی رێزەوە لە تەریقەت و پیاوچاکان و زانایان و مامۆستایانی پایەبەرزی ئاینی و خانەقا و تەکێکان دەڕوانێت کە لە هەمو قۆناغەکاندا خزمەتی بەرچاویان بە گەلەکەمان و شۆڕشی کوردایەتی کردوە و رێبازی نەقشبەندییەکانیش کە خاوەن تەریقەتێکی مرۆڤ دۆستانە و کراوەن، چاکەیان بەسەر هەمواندا هەیە و بە پێزانینەوە لێیان دەڕوانین.