پەروەردەی رۆژئاوای سلێمانی لە راگەیەندراوێکدا سەرجەم ئەو دەنگۆیانەی رەتکردەوە کە گوایە مامۆستا "دانەر کەریم" بەهۆی بایکۆتەوە لە کارەکەی دوورخراوەتەوە و راشیگەیاند، ئەو مامۆستایە بەهۆی پابەندنەبوون بە دەوامی فەرمییەوە لە  کارەکەی دوورخراوەتەوە.

 بە گوێرەی نووسراوێکی پەروەردەی رۆژئاوای سلێمانی کە واژۆی بکر محەمەد بەڕێوەبەری پەروەردەی رۆژئاوای لەسەرە تیایدا هاتووە:" مامۆستا ( دانەر کریم اسماعیل) پسپۆڕی ( هونەر) لەباخچەی منداڵانی ( تەرزە)، ٨٢ رۆژ بەبێ هۆ لە دەوامی فەرمی دابڕاوە، لە کاتێکدا لەو ماوانەی کە لە دەوام دابڕاوە هیچ هۆکارێک و بایکۆتێک لەئارادا نەبووە، بەوهۆیەشەوە بەپێی رێنمایی و یاسا بەرکارەکانی حکومەتی هەرێمی کوردستان لەکارەکەی دوورخراوەتەوە".

مامۆستا دانەر پێشتریش لەکارەکەی دوورخراوەتەوە

ئاماژە بەوەشکراوە:" ئەو مامۆستایە پێشتریش لە ساڵی ٢٠٠٥ بەهۆی پابەندنەبوون بە دەوامی فەرمی لەکارەکەی دوورخراوەتەوە، بەبێ ئەوەی لەو کاتەدا هیچ بایکۆت و هۆکارێک هەبووبێت بۆ دابڕان لە دەوامی فەرمی".
ئەوەشخراوەتەڕوو:" ئەو مامۆستایە لەمیانەی دابڕانەکانی لە دەوامی فەرمی، تەنیا ئەو رۆژانەی مووچە دابەشکراوە سەردانی باخچەکەی کردووە و پاش وەرگرتنی مووچەکەشی باخچەکەی بەجێهێشتووە".