نوری مالیکی سەرۆکی دەوڵەتی یاسا رایگەیاند، پێشێلکردنی سەروەری عێراق لەلایەن هەر وڵاتەکەوە بێت قبوڵکراو نییە و دووبارەبوونەوەی هێرشەکانی تورکیا-ش بۆ سەر هەرێمی کوردستان، زیانێکی زۆر بە پەیوەندییەکانی نێوان عێراق و تورکیا دەگەیەنێت.
نوری مالیکی سەرۆکی دەوڵەتی یاسا لە تویتێکدا ئاماژەی بەوەکرد:" پێشێلکردن و بەزاندنی سەروەری عێراق لەلایەن هەر وڵاتێکەوە بێت قبوڵکراو نییە و دەبێت حکومەت رێککاری یاسایی پێویست دژ بەو پێشێلکارییانە بگرێتەبەر".
زیان بە پەیوەندییەکانی نێوان عێراق و تورکیا دەگەیەندرێت
ئەوەشی خستەڕوو:" دووبارەبوونەوەی هێرشەکانی تورکیا بۆ سەر خاکی هەرێمی کوردستان برینداربوون و شەهیدبوونی هاوڵاتییان لەو نێوەندەدا، زیانێکی زۆر بە پەیوەندییەکانی نێوان تورکیا و عێراق دەگەیەنێت و وادەکات عێراقییەکان بە پێگەی خۆیاندا بچنەوە و دژی هێرشەکانیان بوەستنەوە".
ئەمەش لەدوای ئەوەدێت، لەماوەی رابردوودا تورکیا چەند ئۆپراسیۆنێکی لە خاکی هەرێمی کوردستان ئەنجامداوە، کە بووەتە هۆی گیانلەدەستدان و برینداربوونی چەندین هاوڵاتی مەدەنی.
