بەڕێوەبەری نەخۆشخانەی منداڵبوونی سلێمانی رایگەیاند، رێژەی نەزۆکی لە سلێمانی بە رێژەیەکی بەرچاو زیادیکردووە و هۆکاری زۆرینەشی بۆ کێشەی دەروونی دەگەڕێتەوە.
شلێر فایەق بەڕێوەبەری نەخۆشخانەی منداڵبوونی سلێمانی لە لێدوانێکی رۆژنامەوانیدا ئاماژەی بەوەکرد:" لە ئێستادا رێژەی نەزۆکی لە سلێمانی بەشێوەیەکی بەرچاو زیادیکردووە و خەڵکێکی زۆر تووشی نەزۆکی سەرەتایی و دوایی بوون ".
سەبارەت بە نەزۆکی سەرەتایی و دوایی روونیشیکردەوە:" نەزۆکی سەرەتایی بریتییە لەوەی ئەوەی دوو هاوسەر منداڵیان نەبووە، هەروەها نەزۆکی دوایی بریتییە لەوەی، دوو هاوسەرەکە منداڵیان بووە بەڵام منداڵی دیکەیان نابێت".
راشیگەیاند:" هۆکاری زۆربوونی رێژەی نەزۆکی لە سلێمانی بۆ کێشەی دەروونی دانیشتوانەکەی دەگەڕێتەوە".
شلێر فایەق بەڕێوەبەری نەخۆشخانەی منداڵبوونی سلێمانی دەشڵێت:" لە ئێستادا لەدایکبوون بە نەشتەرگەری زیادیکردووە لەسەر خواستی دایکان خۆیان، بەشێوەیەک گەیشتووەتە ٪٣٤، لە کاتێکدایە بەپێی بنەماکانی رێکخراوی تەندروستی جیهان دەبێت رێژەی لەدایکبوون ٪٢٥ زیاتر نەبێت".