بابەتە سەرەکیەکە: سەرۆکی یەکێتی نیشتمانی کوردستان رایگەیاند،  نابێت چیتر موچه‌ و ژیانی خه‌ڵكی كوردستان تێكه‌ڵ به‌ ململانێ سیاسییەکان بکرێت.

زانیاری تایبەت: سەرچاوەیەکی ئاگادار لە یەکێتیەوە وته‌كانی بافڵ جه‌لال تاڵه‌بانی له‌كۆبونه‌وه‌ی هاوپه‌یمانی ئیداره‌ی ده‌وڵه‌ت ئاشكرا ده‌كات و رایگەیاند: له‌ كۆبونه‌وه‌كه‌دا سه‌رۆكی یه‌كێتی به‌ توندی له‌باره‌ی كێشه‌ی موچه‌ی فه‌رمانبه‌رانی هه‌رێم و دواكه‌وتنی، بژێوی ژیانی خه‌ڵک و شایسته ‌داراییه‌كانی هه‌رێم  قسه‌یكردوه‌ و بۆچونه‌كانی بۆ چاره‌سه‌ركردنی خستوەتەڕوو.

ئەمەش هەیە: سەرچاوەکە وتیشی، بافڵ جەلال تاڵەبانی، داوایكردوه‌ گفتوگۆی روون و جدی بكرێت له‌سه‌ر كێشه‌ی موچه‌خۆرانی هه‌رێم، تاوەکو بزانرێت هۆكاری سه‌ره‌كی ئەو كێشه‌یه‌ چییه‌، چونكه‌ نابێت چیتر موچه‌ و ژیانی خه‌ڵكی كوردستان تێكه‌ڵ به‌ ململانێ سیاسییەکان بکرێت.

زیاتر: سەرۆکی یەکێتی ئاماژەی بەوەشکردوە، بەگوێرەی ده‌ستور ده‌بێت موچه‌خۆرانی هه‌رێم هاوشێوه‌ی موچه‌خۆرانی عێراق مافیان پارێزراوبێت و له‌یه‌ككاتدا موچه‌ به‌ یه‌كسانی دابه‌شبكرێت و هاوڵاتیانمان بێبه‌ش نه‌كرێن له‌ شایسته‌كانیان.

چی تر: بافڵ جەلال تاڵەبانی راشیگەیاندوە، چیتر مایه‌ی قبوڵ نییه‌ به‌ پاساوی جیاجیا و سیاسییه‌وه‌، موچه‌ دوابخرێت و ده‌ستبخرێته‌ قوتی خه‌ڵكه‌كه‌مانه‌وه‌، ئه‌م كێشه‌یه‌ به‌ ته‌واوه‌تی نه‌هێڵین و راستگۆبین له‌گه‌ڵ خۆمان و خه‌ڵكه‌كه‌ماندا.