بابەتە سەرەکیەکە: فەرماندەی گشتی هێزەکانی سوریای دیموکرات رایگەیاند، مەترسیی گروپە جیهادییەکان بەردەوام دەبێت تاوەکو ئەو کاتەی ئەو بنەمایانەی لەسەری دروستکراون تێکدەشکێندرێن.

لێدوانی فەرمی: مەزڵوم عەبدی فەرماندەی گشتی هێزەکانی سوریای دیموکرات – هەسەدە لە چاوپێکەوتنێکدا لەگەڵ زە سەنی بەریتانی رایگەیاند: نەک تەنیا داعش، بەڵکو مەترسیی گروپە جیهادییەکان بەردەوام دەبێت تاوەکو ئەو کاتەی ئەو بنەمایانەی لەسەری دروستکراون تێکدەشکێندرێن.

ئەمەشی وت: داعش هێشتا مەترسییەکی جدییە لەسەر هەموو جیهان، نەک تەنیا سوریا، نزیکەی 60 هەزار چەکداری داعش و ئەندامانی خێزانەکانیان لە کەمپەکانی هۆل و رۆژ-دان.

چی دیکە: داعش پلان دادەنێت بۆ شکاندنی زیندانەکان، پلانی شکاندنی زیندانێکمان شکستپێهێناوە، ئەگەر داعش لەو هەوڵەیدا سەرکەوتوو بێت، ئەوا دەبێتە مەترسیی شەپۆلێکی گەورەی تیرۆر لە هەموو رۆژهەڵاتی ناوەڕاست و دەرەوەشی.

ئەمەش هەیە: مەترسیی داعش لە کەمپەکان و زیندانەکاندا بەردەوامە لە زیادبوون و بەگشتی جووڵەیان زیادی کردووە و پێویستە هەوڵەکان چڕ بکرێنەوە بۆ شەڕکردن دژی داعش، ئەگەر بمانەوێت رێگری لە سەرهەڵدانەوەیان بکەین.

زیاتر: دەزانین بارودۆخێکی نوێ لە سوریا هەیە و ئێمەش مامەڵە لەگەڵ ئەو راستیە نوێیەدا دەکەین و پێویستە سوریا یەکگرتوو بێت و هەڵوێستی ئێمە ئەوەیە، سوریا نابێت دابەشبکرێت و پێویستە مافی هەموو کەمینەکان پارێزراو بێت.

چی تر: ئەمریکا هاوکارمانە لە گفتوگۆکانمان لەگەڵ تورکیا، دەستەی تەحریر شام و سوپای نیشتمانی سوریا، بۆئەوەی بتوانن کێشەکان چارەسەر بکەن لەپێناو داهاتووی سوریا دا.