وەزارەتی تەندروستی عێراق رایگەیاند، تیمی لەناوبردن و فەوتاندنی سەر بە وەزارەتی تەندروستی 614 هەزار و 782 حەب و زیاتر لە 50 كیلۆ ماددەی هۆشبەر و ماددەی كارتێكەری دەروونییان لە بەشی پزیشكی دادوەری لە بەغدا لەناوبردووە.
وەزارەتی تەندروستی عێراق لە راگەیەندراوێكدا بڵاویكردەوە:" لیژنەی لەناوبردن و فەوتاندنی ماددە هۆشبەرەكان، بڕێكی زۆر لە ماددە هۆشبەرەكان و ماددە دەروونییەكان كە بەپێی یاسا دەستیان بەسەردا گیراوبوون و لە بەشی پزیشكی دادوەری لە بەغدا هەڵگیراون لەناوبران".
ئاماژەی بەوەشكردووە:" ئەمە شەشەم جارە ماددەی هۆشبەر لە ماوەی دوو مانگی ئەمساڵدا لە بەغدا لەناوببرێن، پرۆسەی لەناوبردنیش بە سێ قۆناغدا تێدەپەڕێت و پرۆسەی پشكنین و ژماردن و سووتاندن لە كاتژمێر هەشتی بەیانییەوە دەستیپێكردووە تا كاتژمێر دووی پاشنیوەڕۆ لەناو سووتێنەرێكدا كە پلەی گەرمی تێیدا دەگاتە هەزار و 300 پلەی سەدی بووە".